برنامج “الحياة أحلى” على قناة الحدث اليوم فبرك مكالمة مع دكتور مجدي يعقوب
بواسطة: رحمة حجاج
المجلس الأعلى للإعلام طلع بيان إمبارح بوقف برنامج “الحياة أحلى” اللي بيتعرض على قناة الحدث اليوم بعد ما فبركوا مكالمة مع دكتور مجدي يعقوب. ظهروا مذيعين برنامج “الحياة أحلى” إمبارح على قناة الحدث اليوم وهما بيستقبلوا مكالمة هاتفية خلال البرنامج على أساس إنها مكالمة مع الدكتور مجدي يعقوب. وكمان المذيع قال إن دي المرة التالتة أو الرابعة إنه يكلم الدكتور مجدي يعقوب. كان باين من طريقة الكلام إن المكالمة مفبركة. ده غير إن الدكتور مجدي يعقوب مابيظهرش إعلاميًا كتير والوصول له كمان صعب. وأي حد في مكانة الدكتور مجدي يعقوب، بيبقى محتاج من الإعلامي إنه يحضر كويس جدًا ويبقى عامل حساب اللقاء ده. كل دي حاجات كانت سبب واضح جدًا للناس كلها إنها تعرف إن المكالمة دي مش حقيقية أو مفبركة.
المجلس الأعلى للإعلام أصدر بيان بعد الحلقة على طول بوقف البرنامج والتحقيق مع القائمين على البرنامج. كل الناس على السوشيال ميديا إمبارح كانت بتتكلم على الموضوع وإن إزاي ناس بتظهر إعلاميًا والمفروض إنها بتأثر في الناس، يفبركوا مكالمة مع رمز كبير من رموز مصر لمجرد إنهم يزودوا مشاهدات. إعلاميين كتير ومنهم الإعلامي شريف عامر اتكلموا عن الموضوع وطلبوا من الناس إنهم مايخدوش أي إعلامي بغلطات غيره. مقدمين برنامج “الحياة أحلى” شريف عادل ونوران محمود قالوا في تقديم المكالمة: “معانا ومعاكم السير مجدي يعقوب مداخلة خاصة وحصرية لبرنامج الحياة أحلى مع شريف ونوران.. فخور جدًا إني بكلم حضرتك لثالث أو رابع مرة.”
وبعدها اتفاجأ الجمهور بصوت مختلف عن صوت الجراح العالمي بيقول: “أنا اللي سعيد بيكم.. ناس محترمين وتشرفوا البلد.” أما بيان المجلس الأعلى للإعلام قال في بيانه الرسمي: “قررت هيئة المكتب بالمجلس الأعلى لتنظيم الإعلام إيقاف برنامج “الحياة أحلى” على قناة الحدث اليوم، وإحالة المسئولين بالقناة للتحقيق، ومخاطبة نقابة الإعلاميين للتعامل مع الشق التأديبي الخاص بمقدمي البرنامج.”
بعد ما شُفنا فبركة المكالمة، امتى الإعلام هيحترم عقول الناس ويبطل يستهون بيهم؟
قبل ما بيان المجلس الأعلى للإعلام يطلع، الناس أخدت بالها إنها مكالمة مفبركة لأسباب كتير منطقية. بنحيي المجلس الأعلى للإعلام على سرعة القرار وياريت دايمًا يبقى في قرارات حاسمة ضد أي إعلامي أو أي جهة إعلامية بتستهون بعقول الناس لمجرد زيادة مشاهدات أو شهرة أكبر.