بذل السلام للعالم: شعار المؤتمر الأفريقي اللي بدأ في موريتانيا
بواسطة: رحمة حجاج
المؤتمر الأفريقي بدأ يوم التلات في العاصمة الموريتانية نواكشوط. وده المؤتمر الدولي التاني بتنظيم من المؤتمر الأفريقي بهدف تعزيز السلام في المنطقة. المؤتمر انطلق برئاسة رئيس منتدى السلم بأبو ظبي، الشيخ الدكتور عبد الله بن بيه وبالتعاون مع الحكومة الموريتانية. المؤتمر هيستمر لمدة ٣ أيام. شارك في الإفتتاح الرئيس الموريتاني محمد ولد الشيخ الغزواني وممثلون عن الخارجية الأميركية والأمم المتحدة وعدد من المنظمات الدولية ووفود كتير كمان من الدول الأفريقية.
في الإفتتاح يوم التلات، الشيخ عبد الله بن بيه اتكلم فيها عن جائحة كورونا اللي بسببها عرفنا معنى التضامن بين البشر كلهم. واتكلم كمان عن أهمية نشر السلام في العالم كله.
أما بالنسبة للرئيس الموريتاني محمد ولد الشيخ الغزواني قال في الإفتتاح إن التطرف هو سبب كبير في الضرر والفساد اللي بيحصل في دول كتير في المنطقة. قال كمان إن التطرف بيهدد كيان أي دولة وبيعطل أي محاولات للاستقرار والتنمية. ولما اتكلم عن ازاي نقضي على التطرف والإرهاب في المنطقة، قال: “القضاء على التطرف والإرهاب يكون بالعمل على مكافحة الجهل والبطالة والفقر والعمل على إقامة دولة قانون راسخة الأساس وبناء تنمية شاملة مستديمة.”
وعضو اللجنة التنظيمية للمؤتمر النجاشي ولد محمد قال إن خلال التلات أيام اللي هيتم فيهم المؤتمر هيتم مناقشة مواضيع كتير أهمها التطرف ومفاهيم تانية كتير غلط اللي بسببها في مشاكل كتير حصلت دمرت بلاد كتير في المنطقة.
شارك في المؤتمر، الدكتور أسامة الأزهري مستشار رئيس جمهورية مصر العربية للشئون الدينية، وواحد من علماء الأزهر الشريف.
المؤتمر بيضم كتير من الوزراء والسفراء والعلماء والكتاب والمفكرين وكبار الدعاة من مختلف مناطق القارة الأفريقية. والمفروض إن يتم الاتفاق على مشاريع تدعم السلم والتسامح ويواجه الفكر المتطرف في أفريقيا. وكمان يبقى في عمل بشكل جاد علشان نحقق المشاريع دي بشكل دائم.