وزارة الصحة السعودية أعلنت عن إجراءات جديدة تخص المسافرين للمملكة، وأعلنت عن رفع القيود اللي تم فرضها للسيطرة على انتشار فيروس كورونا، أهمها السماح للمسافرين بالدخول إلى المملكة بدون تقديم شهادة التطعيم ضد كورونا، ودي خطوة مهمة بتدي أمل في التخلص من القيود والإجراءات اللي فرضها علينا الفيروس.
من ضمن القيود اللي تم رفعها؛ إلغاء إلزامية إجراء اختبار PCR قبل السفر للسعودية، وكمان إلغاء الحجر الصحي المطلوب للمسافرين لما يوصلوا للمملكة. الوزارة صرحت بإن السبب في رفع القيود هو انخفاض معدل الحالات الإيجابية لكورونا في المملكة لأقل من 4%، ده غير الوصول لمعدل تطعيم 99% لجميع الفئات المستهدفة من سكان السعودية، وهما الأكبر من 12 سنة.
القرارات دي جات بعد وقت قليل من رفع القيود اللي تخص التصاريح الصحية لزيارة الحرمين، زيّ إلغاء التحقق من حالة التحصين في تطبيق “توكلنا” عند الدخول للمسجد الحرام والمسجد النبوي، وإلغاء اشتراط تسجيل بيانات التحصين للحصول على تصريح العمرة في حالة القدوم من خارج المملكة.
ومن ضمن القيود اللي تم رفعها؛ إلغاء تصاريح الصلاة في المسجد الحرام والمسجد النبوي، وإلغاء تطبيق التباعد الجسدي بين المصلين في مساجد المملكة، لكن مع الاستمرار في الالتزام بارتداء الكمامة في الأماكن المقفولة وعدم اشتراط ارتدائها في الأماكن المفتوحة، ده غير رفع تعليق كل الرحلات الجوية اللي رايحة للمملكة.
كل القرارات دي بتخفف القيود اللي العالم اضطر يخضع لها للتصدي لخطر تفشي الجائحة اللي بنعاني منها لأكتر من سنتين، لكن حاليًا العالم بيتعافى من أثاره وبيخفف القيود دي، لكن في الحدود اللي تسمح بالحفاظ على سلامة المواطنين وكمان القادمين من الخارج من بلاد مختلفة.