بدايةً من يناير 2022، الحكومة هتمنع الميكروباص من استخدام الطريق الدائري..

رئيس هيئة الطرق والجسور، حسام الدين مصطفي، قال لصحيفة الوطن إن الميكروباص هيتمنع من استخدام الطريق الدائري تمامًا بداية من يناير 2022.

المسئولين قالوا إن البديل هيكون اتوبيسات النقل العام الجديدة Bus Rapid Transit (BRT) واللي حيكون ليها محطات في التقاطعات الرئيسية على الطريق الدائري، ووضحوا إن تنفيذ القرار ده بقى ممكن بعد ما تم تنفيذ مشروع توسعة الطريق الدائري، وهو واحد من أهم الطرق اللي بتربط محافظة القاهرة الكبرى.

ووضح المسئولين إن حارات الطريق الدائري – اللي بيعدي عليها 213.000 ألف مركبة يوميًا – هيتم توسعتها لحد ما توصل لسبع حارات، بعد ما كانت أربع حارات بس، ما عدا التقاطع الممتد في طريق المنيب، وبالتالي حيتم توسيع كبري المنيب لـ 8 حرارت. وأضاف إن عربيات النقل مش هيكون مسموح لها الحركة على الدائري غير من الساعة 12 بالليل للساعة 6 الصبح.

وزارة النقل قالت إن مشروع أتوبيسات النقل العام الجديدة (Bus Rapid Transit (BRT هيتم تنفيذها بداية من يناير 2022 في القاهرة الكبرى بس، وإن الاتوبيسات الجديدة وسيلة أمنة للنقل وصديقة للبيئة لإنها بتشتغل بالكهرباء أو الغاز الطبيعي، ومسارها على الطريق هيكون في حارة واحدة بس مخصصة للأتوبيسات دي.

تنفيذ مشروع النقل العام الجديد هيبدأ يشتغل بعد ما مشروع توسعة الطرق العامة في القاهرة ما يخلص، وعدد الحارات في الطريق الدائري وكبري المنيب حتوصل لـ 7-8 حارات، وعدد من الشركات المتخصصة حتاخد تراخيص لإدارة مشروع أتوبيسات النقل العام الجديدة، والشركات دي حتحدد سعر التذاكر بحيث يغطي تكاليف التشغيل ويحقق هامش ربح.

هيتم بناء محطات للركاب على طول الطريق الدائري، وخطوط سير الأتوبيسات حتتوصل مع الخط التالت لمترو الأنفاق عند محطة عدلي منصور في القاهرة ومحطة محور روض الفرج في الجيزة، ويتم توصيله مع الخط الرابع والسادس اللي وزارة النقل بتخطط ليه من مترو الأنفاق، وكمان هيتوصل بإمتداد الخط الثاني من المترو اللي هيوصل قليوب.

الخط الرابع من المترو هيمر تحت المتحف المصري الكبير، وهيوصل مدينة السادس من أكتوبر في جنوب القاهرة بالقاهرة الوسطى وشرق القاهرة. الخط الرابع هيتكون من مرحلتين، المرحلة الأولى فيها 17 محطة والمرحلة التانية فيها 20 محطة، طبقًا للوكالة الوطنية للأنفاق.

مصير سواقين الميكروباص بعد تطبيق مشروع النقل العام الجديد

واحد من الحاجات اللي المسئولين ماتكلموش عنها هو مصير سواقين الميكروباص اللي شغلهم على الدائري هيكون إيه؟

دلوقتي لما الميركوباصات هتتمنع من الحركة على الدائري وأكل عيش السواقين دول كله معتمد على مساراتهم على الدائري، السواقين دول هيعملوا أيه؟ هيروحوا فين وهيحصلهم إيه؟ هل وزارة النقل هتكون مسئولة عن توزيعهم على مسارات جديدة وتظبط وجودهم على الطريق؟ ولا الناس دي كده اتقطع عيشهم؟

ولو الوزارة وزعت سواقين الميكروباص على الأتوبيسات الجديدة فعدد سواقين الميكروباص أكبر بكتير من عدد الأتوبيسات اللي حتشتغل في المشروع الجديد، فإزاي الوزارة حتقدر تحتوي عدد السواقين الكبير ده؟ ولا كده معناه إن في ناس كتير حتخسر شغلها وأكل عيشها،؟

ولما الميكروباص يتمنع هل هيتهرب السواقين وياخدوا مسارات تانية زيّ الأوتوستراد؟ ده معناه إن الزحمة في كل الطرق بعيدًا عن الدائري هتبقى أسوء من الأول بكتير، ومعناه إن العربيات الملاكي اللي مساراتهم بعيد عن الدائري لما يلاقوا الزحمة اللي تحت هيضطروا يطلعوا الدائري وكده الدائري هيرجع يتزحم مرة تانية.

نتمنى المسئولين يجاوبوا على الأسئلة دي ويفهمونا إزاي مخططين يحتووا سواقين الميركوباص ويعوضوهم عن شغلهم على مسارات الطريق الدائري.

آخر كلمة: ماتفوتوش قراءة: ترحيل السلطات المصرية لـ 8 لاجئين إريتريين لبلادهم اللي بتنتهك حقوق الإنسان وتجبرهم على العمل

تعليقات
Loading...