بالصور: ولاية وادي بني خالد بعمان، معالمها الأثرية والأنشطة المتاحة هناك
ولاية وادي بني خالد هي إحدى الولايات التابعة لمحافظة شمال الشرقية في سلطنة عمان. وبتقع ضمن سلسلة جبال الحجر الشرقي، وبيسكنها حوالي 11 ألف نسمة. وبتمتلك ولاية وادي بني خالد كتير من المقومات السياحية، أشهرهم كهف بلدة مقل اللي بتتساقط من فوقه المياه وبتنزل في بركة. وبتشتهر كمان الولاية بانتشار العيون زيّ عين الصاروج، وعين دوه، واللثب، وغيرهم من العيون.
![](https://ar.scoopempire.com/wp-content/uploads/sites/4/2021/11/وادي-بني-خالد.jpg)
فالمعالم الأثرية بوادي بني خالد كتيرة ومتنوعة، ما بين الحصون، والأبراج والطبيعة الساحرة اللي بنشوفها في الكهوف، وكمان برك المياه. علشان كده شهد المكان ده ارتفاع كبير في نسب الزيارات له في السنوات الأخيرة. فالسياح والزوار العمانيين بييجوا مخصوص علشان يستمتعوا بالمعالم السياحية، والقيام ببعض الأنشطة زيّ التنزه في متنزه “حاور” الطبيعي والسباحة في العيون والبرك المائية وممارسة رياضة المشى أثناء التجول في الكهوف هناك.
الولاية معروفة كمان بجوها المعتدل في الصيف والبارد في فصل الشتاء. وإنها ولاية جبلية وصحراوية في نفس الوقت فيها كتير من الشلالات والعيون المائية، وده اللي بيخليها مليانة بالسياح طول أوقات السنة، خصوصًا في الشتاء والعطلات الرسمية. حبينا نسلط الضوء على المكان ده، ونتفرج على شوية صور من معالمها السياحية.. بس قبل ما تكمل المقالة، جهز شنطة سفرك، لإنك بعد ما تتفرج على الصور أكيد هتبقى عايز تروح على هناك!
تقدر تزور ولاية وادي بني خالد من خلال طريق مرصوف بيربط بين الولاية وبين بقية المحافظات والولايات، حيث تبعد عن محافظة مسقط حوالي 220 كيلو متر عبر طريق الشرقية و300 كيلومتر عبر الطريق الساحلي.
![](https://ar.scoopempire.com/wp-content/uploads/sites/4/2021/11/940401-1.jpg)
![](https://ar.scoopempire.com/wp-content/uploads/sites/4/2021/11/191585.jpg)