من أول ما سنة 2020 بدأت وإحنا حياتنا اتغيرت بطريقة عمرنا ما كنا نتخيلها، انتشار وباء فيروس الكورونا وإصابة الملايين بيه في شهور معدودة، وموت الألاف حول العالم خلانا كلنا في حالة حذر دائمة. بقينا محتاجين ناخد احتياطاتنا طول الوقت، ونحافظ على المسافات اللي بينا، ونلزم بيوتنا، وفي حالة إصابة حد منا بالفيروس بيكون الموضوع صعب جداً ومعقد بالنسبة للمريض وكل اللي حواليه.
وعلى الرغم من إن مسحة الكورونا مهمة جداً وضرورية في حالة الشعور بأي عرض من أعراضه، خصوصاً بالنسبة للحوامل، وكبار السن، والأشخاص اللي بيعانوا من أمراض مزمنة أو أمراض مناعية لخطورة تأثير الفيروس على صحتهم، إلا إن ناس كتير بتكون قلقانة من الاختلاط في المستشفيات الزحمة أو معامل الاختبار، وده لاحتمالية وجود مصابين بالفيروس هناك والتقاط العدوى منهم سواء للأشخاص اللي رايحين يتطمنوا على حالتهم الصحية أو المرافقين ليهم.
وعلشان كده انتشرت صور لنقط فحص فيروس الكورونا في السيارات بالتعاون بين وزارة التعليم العالي والبحث العلمي وشركة برايم سبيد مديكال، وبالتالي بقت المسحة والتحاليل المطلوبة متاحة في عربيتك من غير ما تضطر تتعامل في الزحمة مع ناس كتير وتعرض سلامتك للخطر. نقط الفحص دي متاحة دلوقتي في المستشفى الميداني التابع لجامعة عين شمس من الساعة 10 الصبح لحد الساعة 6 مساءً، ونتائج التحاليل كلها بتجيلك في رسالة على الواتساب تاني يوم.
