كتب الكتاب دلوقتي من أكتر المناسبات اللي بتهتم فيها العروسة إنها تطلع بلوك شيك وسيط في نفس الوقت، ومع الاحتفال بكتب الكتاب في المساجد أو الكنائس وقلة إقامة الأفراح حاليًا كمان بسبب كورونا، فبقينا نشوف الفنانات والمشاهير بفساتين جميلة ورقيقة في كتب الكتاب بستايل مختلف عن فساتين الزفاف، آخرهم كانت البلوجر دينا داش، اللي انتشرت صور كتب كتابها اليومين اللي فاتوا واحتفل بيها السوشيال ميديا، وفستانها عجب ناس كتير جدًا وكان بسيط وشكلها فيه كان زيّ الفراشة، فتعالوا نشوف كمان أحلى فساتين المشاهير والفنانات في كتب كتابهم.
دينا داش
البلوجر، وأخت الفنان الشاب أحمد داش، فستانها خطف الأنظار بستايله المختلف وبساطته، وشكلها في كتب الكتاب اللي كان فعلًا شبه الفراشة، الفستان من تصميم Pacinthe Badran
دُرة
بفستان هادي وتصميم بسيط، وإحنا متعودين منها دايمًا على فساتين تخطف العين من جمالها وشياكتها، دُرة خطفت الأضواء في كتب كتابها، من تصميم زهير مراد
ميار الغيطي
تألقت الفنانة الشابة ميار الغيطي في كتب كتابها بفستان متوسط الطول، بتصميم ناعم ومنفوش بسيط، الفستان من تصميم شاهندا حجازي.
هنادي مهنا
في كتب كتابها على الفنان أحمد خالد صالح، طلّت هنادي مهنا بفستان أبيض طويل بنقوش بسيطة وتسريحة شعر ومكياج هادي، خطفت الأنظار وقتها وكانت حديث السوشيال ميديا، الفستان من تصميم أحمد العقاد.
حلا شيحة
طلّت لفنانة حلا شيحة في كتب كتابها على الداعية معز مسعود من أيام قليلة، بفستان أبيض رقيق بلمسة بسيطة من قماش الدانتيل، خلى الإطلالة كلها هادية وبسيطة وشيك.
بشرى
في كتب كتاب بحضور عائلي قليل، الفنانة بشرى حرصت إنها تطل بفستان أبيض رقيق مناسب للأجواء الاحتفالية البسيطة، وفي نفس الوقت على أحدث موضة، بتصميم هادي وقصير.
