النهارده يوم طرح الأسئلة الغبية، اللي تم إنشائه أيام التمانينات وكان هدفه تشجيع الأطفال على الكلام والسؤال فى الفصل، من غير ما يحسوا بالحرج من الحاجات اللي مش فاهمينها. ومع نبل سبب إنشاء اليوم ده، وأهمية تحفيذ الكل على السؤال بدون حرج عن الحاجات اللي عايز يعرف أكتر عنها مهما كانت بسيطة، ولكنه كمان فكرنا بكم الأسئلة اللي بنتسئلها في اليوم من الناس اللي حولينا في الحياة العادية (مش الفصل)، واللي حرفيًا بتنتمي لفئة البديهيات، ومالهاش أي علاقة بزيادة الوعي أو المعرفة.
ماتفهموناش غلط، إحنا هنا مش بنحكم على حد علشان الكل بلا استثناء بيقع في الفخ ده وبيسأل شوية أسئلة من النوع ده من وقت للتاني. وبمناسبة وصول يوم Ask a stupid question، قررنا ناخد الموضوع من جانب كوميدي ونسترجع كل الأسئلة الغبية والبديهية اللي بنسمعها (وساعات بنقولها) في الحياة اليومية..
أنت جيت؟
يبقى حرفيًا الشخص لسه داخل من باب البيت، والناس تسأله “إيه ده أنت جيت؟” يا ريت لو حد عارف الإجابة النموذجية للسؤال ده يقول لنا.
هو قالك فين؟
الواحد بيبقى واقف في الحر تعبان وتايه بقاله ساعة، ولما ييجي يسأل حد عن المكان يلاقي الإجابة العظيمة بتاعة “هو قالك فين؟” والله لو كان قال لي فين ماكُنتش شوفت وشي يا باشا هنا.
أنت نايم؟
واحد قاعد في أمان الله قافل النور ونايم في السرير، لازم يلاقي الشخص اللي يدخل عليه ويزقه خمس مرات، وبعد ما يصحى من النوم مفزوع ومش عارف يفتح عينه، هنا بييجي السؤال البريء والتلقائي بتاع “إيه ده أنت نايم؟” وهنا بيحضرنا إيفيه تيمور أنت نمت؟
هي بتمطر بره؟
في شقين هنا من الغباء في السؤال ده. أول شق إن بيكون صوت المطر باين والناس داخلة المكان مبلولة، وبعدين السؤال ده بيتسئل. أما الشق التاني، ففي فكرة السؤال عن إذا كانت بتمطر “بره”.. هو في أوبشن إنها تمطر في حتة تانية؟
هي أحلى مني؟
ممكن مايكونش سؤال بديهي، ولكن الأكيد إنه سؤال غبي، لإن أكيد لما بنت تسأل سؤال زيّ ده للـ partner بتاعها، أكيد هتكون عارفة إنه مش هيعترفلها مثلًا إنه شايفها أحلى منك حتى لو بتقارني نفسك بجينيفر لوبز.. فليه بتسألي؟
فاضي ياسطى؟
ده سؤال ممكن يكون كان بيتسئل أكتر زمان، ولكن برضه لازم نتكلم عنه. يكون التاكسي راكب فيه عيلة بأكملها، وبرضه لازم تلاقي الشخص اللي يسأل سواق التاكسي لو كان فاضي أو لأ.
أنت في البيت؟
يتصلوا بك على التليفون الأرضي بتاع البيت، وأول سؤال تسمعه لما ترد قبل “ازيك؟” حتى هو إذا كنت في البيت ولا بره.. لا تعليق.
ماتجوزتيش / ماخلفتيش ليه لحد دلوقتي؟
يتميز السؤال ده بالغباء والتدخل الزائد وحاجات تانية كتير مش لطيفة. يا ريت لو حد عارف الإجابة النموذجية للسؤال ده، ولجملة “شدي حيلك” كمان يتفضل مشكورًا ويقول لنا عليها.
بتعيطي؟
أول ما بنلاقي نفسنا قدام شخص منهار وواخد جانب وبيعيط، أول سؤال بييجي في دماغنا نسأله كطريقة للدعم هو سؤال الشخص إذا كان بيعيط.. وبجد مش عارفين ليه بنسأل السؤال ده.
اتأخرت عليك؟
يبقى المعاد الساعة سابعة، والشخص في الوقت ده يكون لسه تحت الدُش، ولما يوصل الساعة 9:30 بيبقى لسه في شوية جرأة وشجاعة إنه يسأل “اتأخرت عليك؟”
آخر كلمة: الأسئلة الغبية جزء لا يتجزأ من حياتنا، ومايعبش أي شخص بيسألهم، لإن كلنا بنعمل ده! قولوا لنا إيه تاني أسئلة بتشوفوها غبية نسينا نذكرها..