شوفت الحفلة الضخمة اللي بتتعمل علشان نجوم من العالم كله يتكرموا لأدوار في أعمال فنية كبيرة ومهمة؟ أهو احنا عملنا النسخة العربية بتاعتنا على الضيق لتوزيع جوائز الإيمي، وعازمين جمهور سكوب إمباير علشان نحتفل بتوزيع الجوائز على نجومنا العرب في مسلسلات كانت علامة فارقة في الدراما والكوميديا ولسه فاكرين الأدوار وتأثيرها فينا لحد دلوقتي، تعالوا نشوف مين كسب إيه.
موضوع عائلي – أفضل كتابة لمسلسل كوميدي
المسلسل كان شبه متكامل، كتابة الكوميديا وتفاعل الممثلين معاها بالشكل اللي شوفناه على الشاشة دي ماكانش سهل، الجمهور أتكلم عن المسلسل طول فترة عرضه، ورحبوا بالدراما الكوميدية البسيطة دي، علشان كده المسلسل كسب جائزة افضل كتابة لمسلسل كوميدي، ومستنيين منه الجزء التاني.
منعطف خطر – أفضل إخراج لمسلسل درامي
من الإعلان لوحده تقدر تعرف إن الإخراج فعلًا كان احترافي، المشاهدين كمان أتكلموا عن تفاصيل إخراجية حبوها في المسلسل ده، وأتكلموا كمان عن اختيار الممثلين وتجسيد القصة على أرض الواقع، والتشويق وطريقته غير التقليدية، اللي خلت الناس مستنية النهاية وحل اللغز بفارغ الصبر. كل دي أسباب تخليه يستحق جائزة أحسن إخراج.
٢٠٢٠ – أفضل مسلسل درامي
بأبطال من أهم الممثلين في الوطن العربي، مسلسل 2020 حقق نجاح كبير في السباق الرمضاني 2021، شيء من الدراما والجريمة والإثارة، بيتناقش بشكل يجذب المشاهد ويخليه متحمس للأحداث. ممثلين وإخراج وقصة، كل حاجة بتخدم على التانية بشكل احترافي.
باسل الخياط – أفضل ممثل درامي
باسل خياط كممثل مش بيبطل يفاجئنا بإتقانه للشخصيات اللي بيقدمها سواء في الشر أو الخير، وكان مفاجأة في مسلسل منعطف خطر، وقدرنا فعلًا نقرب من الشخصية اللي قدمها في المسلسل، علشان كده يستحق بجدارة لقب أحسن ممثل دراما.
ريهام عبد الغفور في “وش و ضهر” – أفضل ممثلة درامية
مسلسل حصل على ضجة كبيرة من الجمهور، اللي وصفه بإنه مسلسل واقعي في كل تفاصيله، والتفاصيل دي اهتمت بيها ريهام بشكل كبير وقدرت تجسد الدور ببراعة، واستخدمت كل الوسائل اللي تخليها فعلًا تتقن الدور شكلًا وموضوعًا، علشان كده ريهام عبدالغفور تستحق اللقب ده.
الكبير ٦ – أفضل مسلسل كوميدي
طول رمضان الناس كانت بتتكلم عن المسلسل، ومعظمهم كان المسلسل هو الراعي الرسمي للفطار في بيتهم، ده غير تريندات السوشيال ميديا، والكوميكس والميمز اللي المسلسل تربع على عرشها من رمضان لحد دلوقتي، وتقديمه لنجوم كوميديا يستحقوا فعلًا اللقب ده.
محمد سلام في مسلسل “الكبير”- أفضل ممثل كوميدي
هدرس جزء أساسي وأصيل في “الكبير”، والسنة دي كان ركن رئيسي وعامل في نجاح المسلسل، وتقريبًا هو صاحب أكتر مواد خام للميمز السنة دي، مانعتقدش إن المسلسل ينفع يكون من غير هدرس، علشان كده شايفين إنه يستحق الجائزة دي.
سما إبراهيم في “موضوع عائلي”- أفضل ممثلة كوميدي
سما طلّت علينا ولفتت نظرنا من أول ظهورها في “ما وراء الطبيعة”، وقدرت تقدم دور مختلف خالص في “موضوع عائلي” بشكل كوميدي اجتماعي قريب مننا فعلًا، علشان كده الناس حبتها وكانت بتستنى المشاهد بتاعتها في المسلسل، اللي كانت بتضحكنا فيها بتلقائية.
تحقيق- أفضل مسلسل درامي قصير
المسلسل بدراما وتشويق وألغاز، وكمان بنجوم وأبطال شباب، علشان كده قدر يحقق اختلاف ماشوفناهوش قبل كده، والناس نفسها كانت بترشحه لأصحابها، واضايقوا كمان إنه 12 حلقة بس.
بيمبو – أفضل مسلسل كوميدي قصير
مسلسل كوميدي شبابي بنجوم بنحبهم، الكوميديا فيه كانت قريبة من الشباب وحياتهم والمواقف اللي فعلًا بيقابلوها بشكل يومي، علشان كده الشباب حبوا المسلسل بتفاصيله، واستحق جائزة أحسن مسلسل كوميدي في ترشيحاتنا للجوائز.