من أكتر الحاجات الجميلة اللي تعتبر موروث ثقافي في اللبس، وشعبي بيرجع للتراث المغربي الأصيل، والملحفة المغربية بشكلها ولونها ولفتها هو زي أصيل للستات في المغرب وخصوصًا في الصحراء، وهو توب طويل مش متخيط، بيغطي الجسم كله، بلفة معينة مايحركهاش الهوا، مع إنه مالوش أكمام ولا بيتثبت بحاجة، مجرد لفة معينة محكمة بتتميز بيها المغربيات.
مش بس مجرد زي تقليدي بتلبسه الستات، لكن هما أبدعوا في تصميمه وتطويره وبقى أيقونة جمال في كل المناسبات والأماكن، وبقت الملحفة بتخلي الستات في الصحراء مش بترتاح غير في لبسها، ومش بتفرط فيها مهما كان سنها أو طبقتها الاجتماعية، لإنه تراث ماينفعش يتغير، وبيبدعوا في نقوشات وألوان وتصاميم جديدة ليه، ولإنها كمان بتناسب الجو الحر اللي في الصحراء.
التوب الأصلي للملحفة بلونه الأساسي هو الأبيض، لكن مع الوقت بقى فيه ألوان ونقوشات كتير بتشكل لوحة فنية على القماش، وبتختلف الأحجام والأشكال للملحفة، لكنها في العادي بيكون طولها 4 متر في مترين، وبتختلف حسب المناسبة أو المكان، فملحفة الشغل غير ملحفة الأفراح غير ملحفة الخروج للشارع، وملحفة الشتاء غير الصيف.
ومن التقاليد اللطيفة، إن فيه ملحفات اسمها ملحفات النيلة، ودي بيستخدموها مخصوص علشان يحموا بشرتهم من أشعة الشمس، لإنها بتطلع لون أزرق غامق على الجسم بيفتح البشرة، وبتلبسها ستات الصحراء اللي من عاداتهم الاهتمام بالبشرة والجمال.