المخرج الفلسطيني سعيد زاغة اتمنع من دخول مصر في طريقه لمهرجان الجونة.. إيه السبب؟

اتمنع المخرج الفلسطيني، المُقيم في لندن، سعيد زاغة، من دخول مصر بعد ما السلطات المصرية احتجزته في المطار لمدة 12 ساعة قبل ما يترحل على طياراة خارج مصر. والجدير بالذكر إن زاغة وصلته دعوة رسمية من إدارة مهرجان الجونة السينمائي علشان يحضر فعاليات الدورة الخامسة من المهرجان.

كتبت الناقدة علا الشيخ في بوست على فيسبوك: “اعتبروه رجاء.. عندما يتم دعوة سينمائي فلسطيني إلى أي مهرجان سينمائي عربي، يجب عليكم التأكيد أنه سيدخل تلك البلاد العربية، لا أن يتم حبسه في التخشيبة واقتياده كمجرم إلى الطائرة ومصادرة جواز سفره. السينمائي الفلسطيني ليس مجرمًا.”

وفي تعليق على اللي كتبته الشيخ، قال زاغة: “اللي حصل معايا تجربة مريرة ومهينة جداً” وقال إنه اتمنع من المياه لمدة ست ساعات وهو محتجر في المطار، قبل ما يعطف عليه واحد من موظفي شركة الطيران. وزاغة مشارك في المهرجان السنة دي بفيلمه الروائي الطويل اللي في مرحلة التطوير “حشيشستان” ضمن منصة الجونة السينمائية.

ووضحت عُلا الشيخ إن مدير المهرجان، انتشال التميمي، تواصل معاها وأكد لها إن زاغة تواصل مع السفارة المصرية في لندن وأكدت السفارة إن مفيش مانع من دخوله البلد.

ودي مش المرة الأولى اللي يتمنع فيها سينمائي فلسطيني من دخول مصر علشان يحضر المهرجان، كانت منعت السلطات المصرية الممثل الفلسطيني علي سليمان من دخول مصر علشان يحضر مهرجان الجونة في دورة 2018، واللي كان عضو في لجنة التحكيم للأفلام الروائية الطويلة فيه.

سعيد زاغة، فلسطيني الجنسية والمقيم بشكل دائم في بريطانيا معاه جواز سفر أردني بيوضح إنه من أصل فلسطيني. قال سعيد زاغة إنه سافر لاسطنبول يوم الجمعة، لكن ماسمحوش له يطلع الطيارة التركية اللي رايحة مطار الغردقة، وده المطار المصري اللي بيخدم منتجعات البحر الأحمر والجونة.

المهرجان حجز لزاغة رحلة طيران على مصر للطيران لتاني يوم السبت. بس لما وصل إلى القاهرة ، بدأت المشاكل.

قال زاغة “بعتت نسخة من جواز سفري للمهرجان في سبتمبر وعملت كده مع القنصلية المصرية في لندن، والاتنين أكدوا لي إنه مفيش مشكلة في دخول مصر بس أول ما وصلت، وصلني من مراقبة الحدود المصرية إنه ماينفعش أدخل من غير “تنسيق أمني خاص، رغم إن المهرجان أكدلي إن كل حاجة تمت بالتنسيق مع السلطات”.

وحجز المهرجان لزاغة رحلة تانية راجعة لمطار هيثرو في لندن يوم الأحد. طلع معاه في الطيارة عقيد مصري أثناء الرحلة.

وبينهي زاغة كلامه: “أنا قلقان من إن بعض المهرجانات تبطل تدعو الفنانين الفلسطينيين”اللي معاهم بطاقات“وتقتصر دعواتهم على الفلسطينيين اللي معاهم جنسيات/جوازات سفر تانية علشان يتجنبوا الإحراج”.

وأضاف: “المفروض أستلم جواز سفري البريطاني في خلال الكام سنة اللي جاية بس لحد ما استمله هفضل مصدوم كفاية علشان أتجنب مصر تمامًا. ماقدرش أطلب من حد يعمل حاجة هو مش عايزها، بس أملي إن صُناع الأفلام الفلسطينيون يقفوا مع بعض ضد المعاملة السيئة”.

آخر كلمة: ماتفوتوش قراءة: انسحاب الجمهور والفنانين بعد أول ساعة من عرض فيلم ريش، إيه اللي حصل؟

تعليقات
Loading...