المحلات الكلاسيكية في مصر: حكايات أقدم محلات لسه موجودة لحد دلوقتي

بيلفت انتباهنا ويشد عنينا إننا نشوف مكان بستايل كلاسيكي في شوارع مصر، خصوصًا في القاهرة والإسكندرية، تبقى بتتمشى وتلاقي عينك وقعت على يافطة جميلة لمحل قديم، ويجي في بالك سؤال؛ ياترى إيه قصته وموجود من امتى، والجميل إنه ازاي لسه لحد دلوقتي محافظ على نفس الستايل من غير ما يواكب الموضة، لإنه عارف كويس قيمته كمكان عتيق بكل تفاصيله، علشان كده حبينا نعرف قصة عدد من المحلات الكلاسيكية دي، وأشهرهم:

أوبافيون دي فلوريل

عن: artform

أقدم محل ورد في الإسكندرية، وموجود في شارع فؤاد، اسم المحل يعني “بيت الزهور” باللغة الفرنسية، واختاره الخواجة اليوناني عبده مرسي هو وشريكه المصري المعلم حميدو. المحل عمره أكتر من 100 سنة دلوقتي، وتقدر تشوف فيه زهور مختلفة بتكمل الستايل الكلاسيكي للمكان.

بايوكي

أقدم جواهرجي في مصر والشرق الأوسط، عمره أكتر من 120 سنة، لعائلة بايوكي الإيطالية، والمحل في القاهرة، وهو امتداد لفروعهم المشهورة في إيطاليا، مكانه في وسط البلد في شارع عبدالخالق ثروت، زباينه كانوا أم كلثوم وزوجة شاه إيران وملك إيطاليا. المحل كمان دخل موسوعة جينيس لاحتفاظه بالخزنة الحديدية بنفس طرازها وحجمها اللي بيوصل لمتر عرض ومتر ارتفاع وعمق 2 متر وباب حديد سمكه أكتر من 3 سم، تم صنعها في إيطاليا واتنقلت لمصر عن طريق البواخر البحرية.

شي جابي

أول مطعم عمل بيتزا في الإسكندرية، وواحد من أقدم المطاعم اليونانية في الإسكندرية، اتبنى سنة 1946 وأصحابه يونانيين أصليين، واشتراه منهم جابريل، فرنسي لبناني، سنة 1979، وأطلق عليه اسم “تشي جابي”. مديرة المطعم حاليًا قالت إن “شي جابي” هو اللي قدم البيتزا للإسكندرية، وهو اللي دخلها لمصر من الأساس، وقالت إن عجيبنة البيتزا وخلطة الصوص السرية هي سر نجاح تشي جابي كل السنين دي.

ديليس

من أشهر محلات الحلويات في الإسكندرية من بداية القرن العشرين، موجود في محطة الرمل، ومعروف إن تورتة زفاف الملك فاروق والملكة فريدة اتصنعت في ديليس. المكان بدأ بالمخبوزات، وبعد كده قرر يدخّل الأيس كريم للإسكندرية، وابتكر فيه نكهات جديدة زيّ المستكة.

بابازيان

أقدم محل ساعات في مصر، موجود في العتبة من 1903، ومحتفظ لحد دلوقتي بالطراز القديم كإن الزمن وقف به، تقدر تشوف فيه ساعات عتيقة وتحف مستحيل تلاقيها في مكان تاني.

آخر كلمة: ماتفوتوش قراءة: المشربية: نمط معماري فني جمع بين الجمال والوظيفة والخصوصية

تعليقات
Loading...