اليوم التالت من شهر أبريل، السنة 2021، والعالم كله مركز عينيه على مصر لمتابعة مشهد تاريخي مهيب، انطلقت فيه 22 مومياء (18 ملك وأربع ملكات) من المتحف المصري في ميدان التحرير بوسط البلد، القاهرة، في رحلة امتدت 40 دقيقة، قطع فيها ملوك مصر القديمة 7 كيلو مترات لمثواهم الأخير.
ما بين موكب ملكي ضخم وحفلات موسيقية أوبرالية باللغة المصرية القديمة، ورقصات وشعائر جنائزية من التاريخ المصري القديم، شيعت مصر ملوكها الـ 22 من المتحف المصري اللي كان مثواهم لـ 100 سنة، لمثواهم الجديد، وانتهى الموكب بإطلاق حرس الشرف 21 طلقة تحية لملوك مصر من أمام المتحف القومي للحضارة بالفسطاط، جنوب القاهرة.
حدث بديع ترك المصريين في حالة من النشوى والعالم في حالة من الانبهار، وانقضت الاحتفالات ورجع العالم ينشغل بقضاياه وبهمومه اليومية.
المتحف القومي للحضارة: مصر القديمة كمعرض
في شارع الفسطاط، عين الصيرة، القاهرة، اتوجهنا للمتحف القومي للحضارة، اللي بيشتغل كل يوم من الساعة 9 الصبح لحد الساعة 5 مساء، أما يوم الجمعة فبيكون في فترة مسائية إضافية تبدأ الساعة 6 مساء وبتنتهي الساعة 9 بالليل، أما سعر التذكرة فهو 60 جنيه للزائر، و30 جنيه للطالب.
بيتكون المتحف من دور واحد وجزء سفلي هو قاعة المومياوات الملكية، الدور العلوي من المتحف بينقسم لجزئين، الجزء الأيمن بيحتوى على مجموعة من أهم الآثار المصرية القديمة، أما الجزء الأيسر فهو مجموعة من الآثار المصرية من عصور لاحقة، منها العصر البطلمي والعصر القبطي والعصور الإسلامية في مصر.
الجزء الخاص بآثار مصر القديمة، بيشرح نشأة الحضارة في وادي النيل بتسلسل تاريخي يبدأ من حضارات ما قبل الأسرات، زيّ حضارة البداري وحضارة نقادة والمعادي، وبيعرض آثار تعود للفترة دي، منها نماذج مصغرة من مؤسسات اجتماعية وصناعية، زيّ مطاحن الحبوب، والمخابز، ومؤسسات التعليم، بالإضافة لمجموعات من الجرار والأواني الفخارية.
غير الأقنعة الجنائزية والحلي والتوابيت المذهبة، مجموعة رائعة من التماثيل القديمة منها تمثال من الحجر الأسود للعجل أبيس، وتمثال ضخم للملك أمنحوتب الرابع (أخناتون)، وتماثيل من مختلف الأسرات المصرية القديمة.
أما الجزء التاني من المتحف، فبيضم مجموعة من الآثار من فترات لاحقة، ومنها الآثار الإسلامية، زيّ المنسوجات والأعمال الخشبية والعملات، ومعاه مجموعة من آثار العصور البطلمية والرومانية وعصر النهضة في مصر.
قاعة المومياوات: مدخل إلى العالم السفلي
بعد ما تخلص زيارة للجزء العلوي من المتحف، تقدر تنتقل للجزء السفلي من خلال سلم في منتصف المتحف، سلم بينزلك لقاعة ضخمة مدخلها مزين بالصور الضوئية لمومياوات ملوك مصر وملكاتها.
تجربة استثنائية هتحس فيها إنك بتنزل العالم السفلي فعلًا، وبتزور مومياوات الأجداد في مملكة أوزوريس، ومن خلال المدخل هتنتقل لقاعة جدرانها سوداء، ومليانة بصناديق زجاجية فيها مومياوات 22 ملك وملكة من ملوك مصر القديمة.
كل مومياء منهم بتظهر تفاصيلها الجسدية، من جلد وملامح وش، وشعر وأظافر، وحلي وتعاويذ، كأنها شخص نائم. تجربة مش هتبطل تبهرك في كل مرة هتقف تتفرج على تفاصيل مومياء.
بنشجعك تزور المتحف القومي للحضارة، وتشوف بنفسك محتوياته، وتتابع تقدم الحضارة المصرية من عصور ما قبل الأسرات لحد العصور اللاحقة للأسرات المصرية، وتتعلم ازاي اتقدمت الحضارة على مدار آلاف السنين، واتغيرت أساليب البناء والصناعة، والفلسفة والفنون، والعقيدة وأساليب النحت، وتختبر تجربة قاعة المومياوات بكل رهبتها وجمالها.