في ظل أزمة فيروس كورونا اللي العالم بيعاني منها في وقتنا الحاليّ، لبنان بتصرخ؛ البلد الشامي الجميل مش مستحمل إجرائات احترازية وتلت الشعب تحت خط الفقر، لكن في وقت العتمة، مرة تانية اللبنانيين بيثبتوا مدى تضامنهم مع بعض، وإن لما الدنيا بتضيق، اللبناني ملوش غير أخوه.
في فيديو مدته دقيقة من إخراج إيلي فهد وتعليق صوتي لنادين لبكي المأساة اللبنانية والوجع المتفشي في المجتمع اللبناني بيتصور في شكل الجوع. مليون ومائتين ألف لبناني بيعيشوا بأقل من 7000 ليرة لبنانية في اليوم، كتير منهم من غير وظيفة ولا برنامج دعم اجتماعي. كتير منهم للأسف في ظل الأزمة الاقتصادية اللي لبنان بتعاني منها مش لاقي أكل.
في مبادرة نبيلة من بيت البركة وبنك الغذاء اللبناني بالتعاون مع 95 مؤسسة غير حكومية هيتم توزيع أكتر من 50 ألف صندوق فيه أكل ودواء وأدوات صحية بيتم توزيعه على العائلات اللبنانية الأكثر احتياجًا. الفيديو بيبين الأزمة متفشية إزاي، لكن في نفس الوقت بيدي أمل، إن تكاتف اللبنانيين سوا هيكون السبب في إنهم يعدوا الشدة دي سوا.
الحملة قدرت تجمع تبرعات بقيمة مليون دولار في الفترة اللي فاتت بس، ودعت على حساب إنستجرام الرسمي ليها اللبنانيين بالخارج إنهم يتبرعوا عشان المبادرة تقدر تستمر وتقدم خدماتها لملايين من المحتاجين.
أخر كلمة: كان الله في عون لبنان. لو تقدر تتبرع زور اللينك ده!