القيلولة من الحاجات المقدسة عند المصريين، خصوصًا في أيام الأجازات، وأنت أكيد سمعت والدك في مرة من المرات وهو بيقول “داخل أقيل بعد العصر شوية”، والغريب إن لها سحر غريب في جسم الإنسان وإن الجسم بيقوم بعدها فايق ومليان نشاط بس لو استخدمها صح، لإن ممكن الموضوع يجيب معاك بنتيجة عكسية ويبقى مضر وتصحى بعدها جسمك مكسر وتعبان ودايخ، طب ازاي ناخد قيلولة مثالية؟
مبدأيًا، ماينفعش مدتها تتعدى الـ30 دقيقة، ومن ربع ساعة لـ25 دقيقة هو الوقت المثالي، لإنها في الأغلب لو زادت عن كده هتتحول لنومة طويلة وهتصحى بعدها مصدع. وكمان اختيار وقتها من الحاجات المهمة، وأنسب وقت بيبقى من بعد الضهر، لإنك لو أخدتها بعد كده هتحس بأرق بليل ومش هتعرف تنام في وقتك الطبيعي.
طب بعد ما ناخد قيلولة مثالية، هنستفاد إيه؟
- في دراسات كتير بتقول إنها لها دور فعال في المحافظة على القدرات العقلية ومستوى الذاكرة، خصوصًا عند كبار السن. وفي دراسة اتعملت لأكتر من 2000 شخص من كبار السن لاختبار “الخرف”، وأثبتت إن في علاقة بين إنهم بياخدوا القيلولة وبين إن الذاكرة تكون واعية ونشيطة أكتر.
- بتساعد الموظفين على التركيز والنشاط، لإنها بتحسن من الوظيفة الإدراكية.
- في 2006، كان في دراسة صادرة عن مركز طب وبحوث النوم التابع لمستشفى سانت لوك في الولايات المتحدة، والدراسة ربطت بين الكفايين والقيلولة وازاي هي ممكن تبقى بديل مناسب للكفايين.
- ودارسة تانية بتقول إن لها تأثير زيّ تأثير دواء لتنظيم ضغط الدم، ده غير إنها بتقلل احتمالية الإصابة بأمراض القلب بنسبة 10%.
القيلولة في اليابان فرض ودليل على الاجتهاد
لو دورنا في الثقافة اليابانية، هنلاقيها مختلقة كتير عن أي دولة تانية، خصوصًا في موضوع النوم ده. لو روحت اليابان هتلاقي إنه شيء عادي جدًا إنك تنام لك شوية في وسط اليوم في الشغل، على عكس دول تانية إن ممكن الموظف يتعرض بسببها للفصل. بيعتبروها في اليابان شيء بيدُل على الاجتهاد ومعناها إن الشخص ده أرهق نفسه في الشغل لدرجة النوم.
وحسب صحيفة نيويورك تايمز، بيتم ممارسة العادة دي من أكتر من 1000سنة، ومش مقتصرة بس على أماكن العمل، لأ دي شيء شائع كمان إنك تشوف ناس في المحلات والقهاوي أو على الأرصفة واقفة بتاخد القيلولة بتاعتها، والموضوع ده عادي بسبب إن أكتر من 39% من اليابانيين بيناموا أقل من 6 ساعات. وبعد ما كان في حوادث وفاة بتحصل بسبب فرط العمل، وناس كان بيجيلها سكتات قلبية وهي بتشتغل، بدأوا يجبروا الموظفين إنهم ياخدوا راحة. وفي سنة 2017، انتحر موظف عنده 24 سنة وساب قبلها رسالة إنه هيموت من كتر التعب، وبعدها استقال مدير الشركة.
وفي الأخر وبعد كل ده، القيلولة تستحق إن يتعمل لها يوم عالمي علشان يحتفلوا بها، واحنا بنضم صوتنا لصوت كل الدراسات ولصوت الثقافة اليابانية وبنقول محتاجين قيلولة في الشغل!