عرض أب مصري على النيابة العامة بعد أن أجبر بناته الـ 3 على إجراء الختان وده بعد ما كان فهمهم إنهم نازلين ياخدوا لقاح لفيروس الكورونا المستجد، ودلوقتي هو في السجن على ذمة القضية هو والدكتور اللي أجرى العملية.
ختان الإناث ممنوع في مصر من 2008، وفي 2016 تم سن قوانين لتجريمه بعقوبة ممكن توصل لـ 15 سنة في السجن للي بيؤدي الفعل وعقوبة 3 سنين لأي من مرافقين الطفلة، ولكن بالرغم من ده، العادة المدمرة دي فضلت مستمرة في المجتمع المصري، وأهالي كتير بيجبروا بناتهم عليها وبيخبوا الموضوع عشان ميوصلش للسلطات.
بناءًا على تقرير من الجارديان، في القضية دي زوجة المتهم السابقة بلغت عنه، وفي الحال تم القبض عليه هو والدكتور اللي مارس العملية. بيان النائب العام وضح إزاي الأب خدع بناته اللي كلهم تحت السن الـ 18، وبعد ما اخدوا مخدر كانوا فاكرينه لقاح من الفيروس، صحيوا لقوا نفسهم أُجبروا على الختان.
نادر جدًا لما حد بيوصل للمحكمة بسبب القضية دي، والموضوع مبقاش قضية رأي عام غير بعد ما في بنت صغيرة ماتت في شهر فبراير اللي فات على إيد دكتور كان بيعمل العملية ليها من غير تخدير. الدكتور اتقبض عليه وكان منتظر المحاكمة بس تم إخلاء سبيله على ذمة القضية، ومتحددش ميعاد للجلسة بسبب الوباء المنتشر. وفي 2013، بنت عندها 13 سنة ماتت على إيد دكتور إسمه رسلان فضل وفي 2015 تم الحكم عليه بالسجن، لكن بعد 3 شهور بس في السجن وتسوية وصل ليها الدكتور مع العيلة، خرج فضل من السجن ورجع يمارس الطب تاني.
يونيسيف بتحط نسبة البنات اللي حصلهم ختان في مصر بين سن 15 و49 عند 87%، و14% للبنات تحت سن الـ 15.