شارك في الكتابة: آلاء عبد الحكيم
في فجر يوم التلات، 12 مايو، 2020، عرفنا بوفاة الفنان الكوميدي إبراهيم نصر عن عمر ناهز الـ 70 عامًا، الخبر اللي أحزن مصريين وعرب كتير كبروا على شخصيات زي زكية زكريا في (الكاميرا الخفية) والخال عزمي في (إكس لارج).
إبراهيم نصر بدأ مسيرته الفنية في سنة 1981 في مسرحية (أهلًا يا دكتور) وظهر بعدها في فوازير (مناسبات) في أواخر الثمانينيات، لكن نجمه لمع في سنة 1991 لما ظهر بشخصياته المتعددة في (الكاميرا الخفية) اللي كان أشهرها وأحبها زكية زكريا. إبراهيم نصر فضل يعمل الكاميرا الخفية في رمضان من كل سنة لمدة 17 سنة متتالية، وفي مقابلة له قال: “كنت بتفرغ الـ 12 شهر عشان الـ 33 حلقة بتوع رمضان، عشان الناس تشوف حلقة مختلفة عن التانية”.
وفعلًا، الكاميرا الخفية كان مختلف عن أي حاجة المنطقة العربية شافتها قبل كده، وخلق عبارات جديدة من خلال حلقاته زي “يا نجاتى انفخ البلالين علشان عيد الميلاد” و”لما أقولك بخ تبخ” و”اوعى الجمبرى يعضك”.
ومن أشهر الشخصيات اللي عملها كان غباشى النقراشي، وزكية زكريا، والشخصية دي بالذات ارتبطت فى ذاكرة الجمهور، ومن شدة شهرتها خرجت من حيز الكاميرا الخفية وقدمها على خشبة المسرح من خلال مسرحية (زكية زكريا والعصابة المفترية) وقدمها سينمائيًا في فيلم (زكية زكريا في البرلمان).
في آخر مسيرته الفنية، قرر إبراهيم نصر يوقف الكاميرا الخفية ويتجه للسينما والدراما، وفي فيلم (إكس لارج) ظهر بشخصية الخال عزمي اللي كلنا حبيناها.
ولما اتسأل قبل وفاته عن لو كان هيحب يعمل الكاميرا الخفية تاني قال: “قولتلهم لو جبتولي مال قارون مش هتقدروا تقنعوني.. ما زلت جبانا.. خايف أرجع فاعمل حاجة أقل، أو الناس تقابلني في الشارع تقول لي ليه كده يا إبراهيم يا نصر، أهو ده لو حصل هتلاقيني جاري على ظابط شرطة واخد الطبنجة بتاعته وضارب نفسي”.
إبراهيم نصر كان شخص موهوب ومتقن لعمله، وبالرغم من حزننا على فراقه، هنفضل فاكرينه بأعماله اللي سابهالنا، ويكفي إن برامجه لحد دلوقتي الناس بتحلف بها لأن أبطالها كانت من الشارع والضيف بيضحك من قلبه وكانت لكل العيلة.