إنجازات العرب في أولمبياد طوكيو 2020، اللي مشرفيننا في الألعاب المختلفة، والناس بتشجعهم وبتتابع المباريات مهما كان ميعادها، والبلاد العربية بتنافس بقوة في الألعاب، ولحد دلوقتي، أول ميداليتين من نصيب دول عربية في رياضة التايكوندو ورياضة السباحة، ولسه مستنيين إنجازات تانية في وقت قليل من اللاعبين العرب في مختلف الرياضات، تعالوا نعرف تفاصيل أكتر عن أبطالنا اللي أحرزوا الميداليات.
تونس لحد دلوقتي ليها نصيب الأسد في الأولمبياد من المشاركين من الدول العربية، بأبطالها المشاركين في الألعاب المختلفة، أولهم السباح التونسي أحمد الحفناوي فاز بالميدالية الذهبية في سباق نهائي الـ 400 متر سباحة حرة، وبكده يعتبر الحفناوي أول من منح العرب ميدالية ذهبية في الأولمبياد. الحفناوي صاحب الـ 18 سنة، حقق حلمه ومش مصدق إنه دلوقتي بطل أوليمبي. وهيخوض سباق 800 متر بعد تألقه وإحرازه الألقاب في سباقات البطولات الفرنسية قبل كده.
سباق نهائي الـ 400 متر سباحة حرة #أولمبياد_طوكيو و فوز التونسي أحمد الحفناوي بالميدالية الذهبية. 💪😍 ♥️🇹🇳✌️
Posted by عمر حشاني on Saturday, July 24, 2021
وكانت أول ميدالية عربية في الأولمبياد من البطل محمد خليل الجندوبي اللي تم تتويجه بالميدالية الفضية في التايكوندو وزن 58 كج، الجندوبي صاحب الـ 19 سنة، فاز قبل كده ببرونزية التايكوندو في أولمبياد الشباب الصيفي سنة 2018 لوزن 48 كج في الأرجنتين، وكمان ذهبية الألعاب الأفريقية 2019 لوزن 54 كج في العاصمة المغربية الرباط.