ممثل اتعرف واتشهر أكتر بأدوار الشر، مش شر عادي، لا ده شر معجون بأمراض نفسية وعُقد تخليك تكرهه أو تخاف منه كمان، لدرجة إنك مش بس بتتفاعل مع الشخصية اللي بيقدمها ويبقى عندك مشاعر كره له، لأ هيوصلك إنك تخاف منه أصلًا، بيقدر يقدم ده بشطارة، لكن كمان لما بيعمل دور طيب رومانسي بيوقعك في حب الشخصية، وتبقى عايز تدافع عنه من أشرار المسلسل أو الفيلم. باسل خياط بيقدر يعمل الاتنين بسلاسة، وشوفنا ده في أعمال فنية كتير.
30 يوم
مريض نفسي، بيلفف البطل حوالين نفسه طول المسلسل، وبيهدده بقتل أقرب الناس له في لعبة أو تحدي لمدة 30 يوم، طلّع فيه كمية أمراض نفسية تكفي مستشفى. مش بس خلّانا نكرهه، ده كنا بنتمنى كل أبطال المسلسل ينتقموا منه على اللي شوفناه. تعاطفت معاه ولا خوفت منه؟
الرحلة
طول المسلسل قارفنا بـ أنا بحميكي من الوحوش اللي برا دول”، ومفيش وحش غيره أصلًا.. حابس مراته ومخّوفها من العالم كله، ومفيش حد بيأذيها غيره هو بعُقده النفسية ومشاكله اللي بيطلعها عليها، ومخلينا طول ما احنا بنتفرج على المسلسل عايزين نجيب رجالة ونطلع على بيتهم نحرر مراته وبنته.
الكاتب
ده المسلسل اللي يديلك فرصة تتعاطف مع باسل خياط في شخصيته، ويمكن كمان تبقى معاه في طريقة أخد حقه في النهاية. طول المسلسل شخصيته كويسة، كاتب روايات بيتحط في أزمة وبيتم اتهامه في جريمة قتل لبنت من معجباته، اتقتلت بنفس الطريقة اللي هو كتبها في رواية قبل كده، ومعظم الأدلة ضده، لكن بتيجي محامية من معجبيه تدافع عنه وتخرجه من القضية، ولما حصلت مفاجأة المسلسل، وباسل هياخد حقه من اللي ظلمه، مش هتضايق إنه بقى شرير شوية.
تانجو
المسلسل ده فيه علاقات داخلة في بعض شوية، واللي بيحب حد مرتبط بحد تاني والعلاقات المستحيلة دي، بس دور باسل خياط كان رومانسي، متخيل؟ الأجمد بقى إنه يخلي المشاهدين يحبوه من كتر الطيبة والرقة والرومانسية اللي كان بيتعامل بيها، رغم إن ممكن تبقى من جواك قاعد بتتفرج ومتحفز لأي لحظة غدر أو شر، يا ترى هتحصل؟
النحات
هنا شخصية البطل الطيب كما يجب أن يكون، من غير أي حاجة تعكر صفو الطيبة، قدر باسل خياط يقدم الشخصية بمنتهى السلاسة ويقنع الجمهور بشخصيته وطيبتها، وقدر يحبب الناس فيه، في الـ 3 شخصيات اللي قدمها، لإن باسل قام بدور البطل، وباباه، وعمه كمان، بس مش بأسلوب رخيص وإن الإنتاج حاطط ميزانية قليلة لا. باسل كان أكتر واحد مناسب يقدم الأدوار دي، بكل الاختلافات والصراعات لكل شخصية فيهم. وده من أكتر المسلسلات اللي باسل خياط قدر يظهر قدراته التمثيلية.