كشفت فوربس الشرق الأوسط عن قايمة السنة دي للمبدعين والمبتكرين الشباب في المنطقة، واللي سمتها “30 تحت التلاتين”.
إيه هي القايمة دي؟
القايمة بتضم أهم المبدعين الشباب اللي سنهم تحت التلاتين في 30 مركز بالترتيب، وممكن المركز الواحد يبقى فيه شخصين، إذا كانوا في المشروع نفسه، وهي بالتالي تتكون السنة دي من 35 شخص بيحملوا 13 جنسية.
الدول والتقييم
أعضاء قايمة فوربس المبدعين جايين من 8 دول في الشرق الأوسط، بينهم 12 شاب وشابة عايشين في مصر، و10 في الإمارات، و5 في لبنان، و3 في السعودية.
وعملت فوربس الشرق الأوسط مسح لدول المنطقة كلها، علشان تلاقي المواهب الشابة والواعدة في المنطقة، وجمعت الترشيحات عن طريق استبيان على الإنترنت، بيقدر من خلاله المتقدمين ترشيح نفسهم أو أي شخص تاني.
“فوربس” وضحت إنها استقبلت أكتر من 400 ترشيح، وإن فريق البحوث والتحرير في فوربس اشتغل على تقييم المرشحين علي جولتين، لإعداد قايمة مختصرة ضمت 80 مرشح، وفي خبراء في مجالات اختصاصاتهم بحثوا في بيانات المرشحين، علشان يختاروا اللي يستحق التأهل للقايمة النهائية، عن طريق تقييم تأثير المرشحين على الصناعة والسوق والمجتمع.
ده بالإضافة للبيانات الكمية والأرقام، زيّ حجم التمويلات والجوائز الي فازوا بها، والإيرادات، وقيمة الصفقات، وعدد الأشخاص المتأثرين بيهم، وعدد العملاء والمتابعين عبر مواقع التواصل الاجتماعي.
شروط الترشح
علشان تتأهل لقايمة 2022، لازم يكون عمر المرشح أقل من 30 سنة، مفيش شروط متعلقة بالجنسية، بس لازم المرشحين يثبتوا إقامتهم في منطقة الشرق الأوسط وشمال أفريقيا، وإذا كان للشركة اتنين أو أكتر من المؤسسين ووقع عليهم الاختيار، بيتم احتسابهم كمرشح واحد.
نماذج التأثير الاجتماعي
اخترنا في المقال ده نماذج مختارة من القايمة، واللي عملت تأثير اجتماعي مهم بإبداعها ونشاطها في العالم العربي.
هالة الوقداني
بحكم تخصصها في الجيولوجيا، كانت تجربة هالة التعليمية من البداية مش تقليدية، واتضمنت التعلم من خلال الرحلات الجيولوجية والمختبرات جنب التخصص العلمي النظري.
بدأت رحلتها كمدرسة لما اتطوعت لتعليم أطفال الحضانة في المركز الإسلامي بتوسان في الولايات المتحدة الأمريكية لمدة تلات سنين، وتم اختيارها لتمثيل الشرق الأوسط والمملكة العربية السعودية، كمبعوثة من قسم دراسات الشرق الأوسط للمدارس العامة الأمريكية في مدينة توسان بولاية أريزونا الأمريكية.
بعد انضمامها لشركة “أرامكو”، كبرت تجربتها مع التعليم علشان تتضمن المشاركة في برنامج “ستيمانيا” اللي بيستهدف طالبات المرحلة الابتدائية والمتوسطة، وبرنامج موهبة الصيفي اللي بيستهدف طالبات المرحلة الثانوية، بالإضافة لمشاركتها كمرشدة في الرحلة الصيفية الجيولوجية السنوية لجامعة الملك فهد للبترول والمعادن بعمان.
كانت المسؤولة عن شؤون الطلاب بالشرق الأوسط لجمعية جيولوجيي البترول، وده خلاها تنضم لواحدة من أكبر المسابقات التقنية في عالم اكتشاف البترول، ده جنب تأسيس برامج تعليمية للطلبة من أماكن كتير بالشرق الأوسط.
حسن الحراكي
الحراكي هو سوري مقيم في قطر، وشارك في تأسيس منصة (Bevol) في سنة 2017، وهي منصة بتعرّف المتطوعين بفرص التطوع المتاحة، وممكن لأي شخص مهتم بمجال العمل التطوعي، سواء عن طريق المشاركة الجسدية أو افتراضيًا، إنشاء حساب لاستكشاف الفرص المتاحة، وفي الوقت نفسه ممكن للمؤسسات الحكومية والمنظمات غير الحكومية والجمعيات التسجيل في بيفول، وطلب متطوعين والإعلان عن الأنشطة مجانًا.
المنصة جذبت أكتر من 60 ألف متطوع من أكتر من 175 دولة حوالين العالم.
محمد الجاويش ومصطفى عبد المنعم
شارك عبد المنعم والجاويش في تأسيس منصة “iSchool” في 2018، لتعليم البرمجة للصغار من سن 6 سنين حتى 18، المنصة عليها دروس برمجة في الذكاء الصناعي وعلوم البيانات وتطوير الألعاب والواقع الافتراضي.
المنصة خرجت 9 آلاف شخص من 10 دول، كمان أطلق جاويش ومصطفى مبادرات ومسابقات تعليمية، وده اللي ساعد أكتر من 57.6 ألف طالب علشان يعرفوا التقنيات الحديثة.
موسى سالم
سالم شارك في تأسيس شركة “Colibri Care” الطبية في 2020، لتطوير وتصنيع الأجهزة الطبية في الشرق الأوسط، اشتغل على تطوير منتجات بتساعد في السيطرة على النزيف في العمليات الجراحية وحالات النزيف الشديدة، لكنها بتتكلم عن طفرة في الممارسات الطبية التانية زيّ خلع الأسنان.
معتصم العولقي
شارك العولقي في تأسيس “NomuHub” في 2017، وقدم مفهوم السفر بهدف، وبتقدم الشركة عروض سياحية في بلدان، زيّ زنجبار والمغرب وسريلانكا وكينيا وبالي ونيبال، المنصة بتمكن المسافرين من استكشاف البلدان دي، والمساهمة في أعمال تطوعية في الوقت نفسه، زيّ بناء مدارس، والمشاركة في برامج تنمية مجتمعية، ومعسكرات طبية.
المنصة جددت أكتر من 200 فصل دراسي في جميع أنحاء العالم، وساعدت أكتر من 30 ألف مريض من خلال الحملات الطبية في أفريقيا.
نادية مراد
هي ناشطة في مجال حقوق الإنسان، وحائزة على جائزة نوبل للسلام في 2018، نادية مناصرة للناجين من الإبادة الجماعية والعنف الجنسي، خصوصًا بعد ما هاجم تنظيم داعش مدينتها في العراق وهي سنجار في 2014. مبادرة نادية مراد بتهدف لإقناع الحكومات والمنظمات الدولية بدعم إعادة التنمية المستدامة للمجتمع الإيزيدي، والناجين من العنف الجنسي في العالم.
الشيخة موزة بنت مروان آل مكتوم
تعتبر سمو الشيخة موزة بنت مروان بن محمد بن حشر آل مكتوم عضو بارز في المجتمع الإماراتي، وهي بتنتمي للأسرة الحاكمة في دبي، درست الشيخة موزة الطيران لأول مرة في عمر الـ 12 سنة، وفي 2013، حققت رقم قياسي ودخلت موسوعة جينيس والتحقت بأكاديمية أكسفورد للطيران.
في سنة 2015، بقت الشيخة موزة أول امرأة بتشغل في مهنة الطيران في طيران الإمارات من الأسرة الحاكمة بدبي، وفي سنة 2019، بقت ملازم أول طيار في شرطة دبي، وفي نفس السنة أسست جمعية المرأة في الطيران، لتقديم الدعم للمرأة ورفع مستوى الوعي بالفرص المتاحة في المجال ده.
وضاح ملاعب
أسس ملاعب DLOC Biosystems في 2017، وهي شركة ناشئة في مجال التكنولوجيا الحيوية وتطور الشرائح البيولوجية، اللي بتقدر تشكل نسيج خلايا بتشبه كتير الموجودة في جسم الإنسان.
ده هيساعد الشركات تجرب الأدوية وتتنبأ بدقة ومدى فاعليتها قبل تجربتها على الإنسان.