الشتا تفاصيله كتير وكلها بنحبها وبنستناها، من السقعة للمطر وريحته والشوارع اللي بتبقى هادية لصوت فيروز للجواكت الجلد للشرابات اللي بتدفينا، ومع السقعة والتكتكة اللي بنبقى فيها في فصل الشتا، بنبقى محتاجين حاجات سريعة تدفينا وفي نفس الوقت تدينا طاقة، ومفيش أحسن من المشروبات اللي بنجري عليها وبنلجأ لها في الوقت ده.
السحلب
نبتة السحلب بتنتمي لعائلة الأوركيد وبتنمو في الأيام الأولى من الصيف، وبيستخدم في مجالات طبية كتير، بعيدًا عن إنه من المشروبات اللي بتدفي بس هو كمان بيقوي المناعة وبيساعد في تحسين الحالة المزاجية وتنشيط الدورة الدموية، وممكن نزينه بأكتر من طريقة سواء بجوز الهند أو المكسرات، أو نضيف عليه مياه ورد أو زهر، سبب ريحته الحلوة إن أصله من نباتات الزينة واللي في منها لها ريحة حلوة وقوية.
حمص الشام
يعتبر من المشروبات الشعبية المفضلة عند المصريين بالذات، وجزء من الفلكلور المصري، هتلاقي منه عربيات كتير منتشرة في كل حتة في مصر، وده المكان الرسمي اللي الناس بتحب تشتري منه وبتفضله عن المحلات لإنه بيبقى له أجواء معينة، بجانب إنه مشروب رسمي لكل الناس اللي بتحب تتمشى على الكورنيش والحبيبة، وبيدي طاقة وسعراته الحرارية قليلة وبيساعد في تقليل نزلات البرد.
الشاي باللبن
بيعتبر من المشروبات المحببة عند ناس كتير سواء في الصيف أو في الشتا، وبيحلو أكتر مع “السقسقة” بالبسكوت أو الكيك، الناس على السوشيال ميديا بيمجدوا وبيكرموا المشروب ده، وبيوصفوه بإنه مشروب الناس البريئة -وده طبعًا نظرية من وجهة نظرهم ومالهاش أي علاقة بأي مصدر علمي بيقول الكلام ده- بس حلو التشبيه!
شوربة العدس
الطبق ده له مكانه خاصة في قلوب المصريين، بيعتبر الراعي الرسمي لفصل الشتا، غنوله قبل كده أغنية “العدس الليلة ليلة عيده” علشان يعبروا عن مدى ارتباطهم بالطبق ده، وده لإن مصر بتعتبر من أوائل الناس اللي زرعته من آلاف السنين، غير إنه بيدفي جدًا وبيدي طاقة، بيتعبر من أغنى البقوليات وممكن نستبدله باللحمة، ده غير كمان من الأكلات اللي بتشبع خصوصًا إننا دايمًا بنجوع في الشتا بدون سبب.
الشوكولاتة الساخنة بالمارشيملو
من المشروبات السخنة اللذيذة والسريعة ومكوناتها مش كتير واللي بيحبها الكبار والصغيرين، وممكن نشربها لوحدها أو بالمارشيملو أو بالموز أو القشطة، وطريقته زي الشاي باللبن ولكن بدل الشاي هتضيف الشكولاتة، مفيش أسهل من كده، وفي سر صغير أو تركاية على رأي الشيف الشربيني وهو إننا نضيف معاه الفانيليا، بتدي طعم وريحة مميزة.
الينسون
بيعتبر من الأعشاب الطبيعية اللي بتقف سد منيع وحماية وعلاج لعلاج نزلات البرد والتهابات الحلق وطرد البلغم وتهدئة الكحة اللي بيكتروا أوي في الفصل، وبيعالج من بعض المشاكل التنفسية خصوصًا لو اتشرب مع معلقة عسل وعود قرفة.
القرفة بالحليب
غير إنه بيدفي بسرعة، فبيحتوي على فيتامينات منها الكالسيوم وفيتامين (B12)، وأكتر وقت مناسب لشربه هو بعد يوم طويل ومتعب قضيته في الجامعة أو المدرسة، لإنه بيساعد على النوم الهادئ علشان الحليب والقرفة مع بعض بيشتغلوا على تهدئة الأعصاب وإزالة التوتر، وكمان بيقتل البكتريا والفطريات من الفم وده بناءً على موقع تايمز.
أسباب وتفاصيل كتير ممكن تخلينا متعلقين بالشتا مهما كبرنا ومهما العمر عدى بينا، وهيفضل انتظاره والاحتفال به عند فئة من الأشخاص شيء مقدس وكإنه عيد من الأعياد.. ومع أول توليعة للسبرتاية علشان نعمل عليها حاجات سخنة ومع أول نسمة هوا سقعة بنقول أهلًا بالشتا.