أكتر من سنة عدت ولسه وباء كورونا منتشر في بلاد العالم كله، وبرغم إن معظم البلاد بدأت تدريجيًا ترجع للحياة الطبيعية قدر الإمكان، ولكن لسه الوباء والخطر موجودين، وعلشان كده لازم نكون حذرين وناخد كل الإجراءات الاحترازية علشان نحمي نفسنا وغيرنا من الإصابة بالمرض. وبما إن الصيف داخل وكتير من الناس هتكون حابة إنها تسافر أو تصيف بره، فوزارة الصحة العالمية وخبراء الطب قدموا 10 نصائح في حالة السفر في ظل تفشي كورونا للحد من احتمالة الإصابة بالمرض.
من أهم الخطوات هو لازم لبس الكمامة، واستخدام الكحول دايمًا أثناء التواجد في المطار، وتجنب لمس الأشياء قدر الإمكان، وكمان الحفاظ على التباعد الاجتماعي ونظافة الإيد.. من المهم كمان إنك تتبع الإجراءات الاحترازية اللي بتتبعها البلد اللي انت مسافرلها ومراقبة الصحة والأعراض بعد السفر بأسبوعين علشان تتأكد إنك ماتصابتش. ولما تكون في الفندق وزارة الصحة العالمية نصحت بتجنب الأكلات اللي مش مطبوخة كويس، ويستحسن تناول الأكل بعد التسخين، وطبعًا لو حسيت بأي أعراض لازم تروح المستشفى أو إنك تعزل نفسك وتاخد البروتوكول علشان تتحسن وماتعديش حد بالمرض.
طبعًا الناس هتكون حابه إنها تستمتع في الأجازات أو تقابل أهلها اللي قاعدين بره، ولكن مهم كمان مراعاة الصحة العامة، وإنك تاخد الموضوع جد، والالتزام بالإجراءات الاحترازية وإتباع نصائح الأطباء ومنظمة الصحة العالمية علشان نقدر نسيطر على المرض ونخرج من الأزمة دي بأقل الخسائر.