في إطار رؤية المملكة العربية السعودية 2030، أطلق ولي العهد محمد بن سلمان، الاستراتيجية الوطنية للألعاب والرياضات الإلكترونية، وهي الخطوة اللي بتُعتبر جزء من خطة الأمير في تنويع اقتصاد المملكة وفتح مجالات اقتصادية مستقبلية بعيدة عن اقتصاد النفط، وتوفير فرص العمل في مختلف المجالات.
أكد الأمير إن الهدف الأساسي من الخطوة دي هو: “جعل المملكة مركزًا عالميًا لقطاع الألعاب والرياضات الإلكترونية بحلول 2030”. ومن خلال دعم محترفين الرياضات الإلكترونية وتوفير بطولات ترفيهية ضخمة في المملكة، ودعم سوق صناعة الألعاب الإلكترونية لتحويل المملكة لمركز أساسي من مراكز استديوهات تصنيع الألعاب، بتهدف الاستراتيجية لتحويل المملكة لقبلة عالمية في السوق ده، بدخل اقتصادي يهدف لـ50 مليار دولار أمريكي من مجمل دخل المملكة الاقتصادي و29 ألف فرصة عمل بحلول سنة 2030.
بتستغل استراتيجية توطين الألعاب والرياضات الإلكترونية في المملكة حقيقة إن القطاع ده بينمو بسرعة كبيرة جدًا في العالم كله، وجمهوره بيزيد كل يوم، وده اللي بيعتبره العالم النهارده اقتصاد في حد ذاته، واقتصاد قوي ومقاوم للصدمات الاقتصادية العالمية كمان.
يتوقع الخبراء الاقتصاديين إن سوق الألعاب الإلكترونية هيوصل لـ200 مليار دولار أمريكي في سنة 2023، ونشرت جريدة “واشنطن بوست” تقرير بتاريخ 22 أغسطس (آب) 2022، بيوضح إن سوق الألعاب الإلكترونية قاوم الركود الاقتصادي اللي شهده العالم في 2008، وفضل محافظ على نفس المبيعات رغم انكماش اقتصاد البنوك والعقارات، وده اللي بيأكد قدرته الكبيرة على المقاومة في ظل الركود الاقتصادي، بالذات إن العالم النهارده بيمر بواحد من أسوء حالات الركود الاقتصادي في التاريخ.
أما موقع “رويترز” فنشر تقرير في 2019، وضح إن سوق الألعاب كانت مدخلاته للاقتصاد الأمريكي في نفس السنة أكتر من 90 مليار دولار أمريكي، وأمن أكتر من 490 ألف وظيفة للمواطنين الأمريكيين، وإن الأرقام دي بتزيد مع الوقت.
ولإن الجيل الجديد من شباب الدول العربية مهتم ومحب للألعاب الإلكترونية بنسبة وصلت في المملكة وحدها لـ21 مليون شخص، فاستراتيجية التوطين اللي بتحصل في المملكة النهارده هي الخطوة اللي كل الدول العربية محتاجة تاخدها بالذات إن كل المؤشرات بتقول إن السوق ده هيكون واحد من أهم مصادر الدخل في المستقبل.
وقرار ولي العهد السعودي بإطلاق استراتيجية مهمة زيّ دي مش شيء غريب على شخصه، اللي طبقًا لصندوق الاستثمارات العامة السعودية، أنفق حوالي 3 مليار دولار أمريكي في 2020 كاستثمارات في شركات الألعاب الإلكترونية. واستحوذ الصندوق على 14.9 مليون سهم في شركة Activision Blizzard اللي بتملك لعبة Call Of Duty وغيرها من شركات الألعاب.
والأمير معروف بإنه بيحب يلعب Dota 2 ومشهور جدًا في أوساط محبين اللعبة كأسطورة، ورغم إنه ماعترفش بشكل مباشر أبدًا إن حساب “Purrrrfect Angelic Cake Yuki” بتاعه، إلا إن في إشاعات كتير بتأكد إنه صاحب الحساب اللي بيتغير بشكل دوري.
ومن المعروف إن الأمير هو واحد من أهم المشاركين في دورات مسابقة International 10 competition وتُعتبر شخصية Crystal Maiden، واحدة من أكتر الشخصيات اللي بيلعب بيها الأمير.