بنقول دايمًا إن في حلول رغم إن الطرق تبان مسدودة، بس قدر المهندسين المعماريين، كارل كرم وجهاد فرح، إنهم يلاقوا حل لمواجهة الأزمة الاقتصادية اللي بتعاني منها لبنان من أكتر من سنتين، قرروا يلاقوا بديل لسفرهم وغربتهم عن بلدهم، فاتجهوا لزراعة وإنتاج “الزعفران” أو “الذهب الأحمر” كواحد من الحلول المجزية والمناسبة لكل الأوضاع، شافوا شيء مشترك بين الهندسة المعمارية والزراعة خلتهم ياخدوا القرار.
الذهب الأحمر واحد من أغلى التوابل في العالم، كيلو جرام منه بيتراوح سعره من 6 لـ 8 ألاف دولار، بمجهود كارل وجهاد قدروا إنهم يخلوا الزراعة دي متاحة على أرض لبنان، المزرعة مساحتها هكتار واحد “10000 متر مربع” بدأ فيها كارل وجهاد زراعة أزهار الزعفران الأرجوانية، وفي تصريحات لـ “سكاي نيوز عربية” قالوا: “قررنا مع كل ما يحدث في البلد من أزمات، البحث عن أي عمل يساعدنا على البقاء بلبنان، فكنا نسمع كثيرًا عن الزراعة لكن لم نقرب عليها، فمن هنا من 2017 بدأت فكرة زراعة الزعفران وتحول الحلم لحقيقة”.
وبيقول واحد من المهندسين المعماريين “أنا كتير مسافر، سافرت على أكتر من 50 دولة حول العالم، ولا مرة كنت متخيل إنه حكون عم بزرع وأقطف زعفران أو منتج تاني، نمط الحياة اللي كنا عايشينه كان كتير مليح، بس أنا كمان بحب هيدا البلد، بحب لبنان وحقيقة بدي أظل أعيش بلبنان”.
ليه الزعفران؟
وعن تفاصيل الزراعة بيقول إنها مش بتحتاج لمياه كتير، كل اللي محتاجاه دقة في العمل، وكل اللي عليهم إنهم يعدوا الزهور بعد قطفها وفصل مياسمها بحذر شديد وتجفيفها بشكل يدوي، وعلشان تجيب 100 جرام من الزعفران هتحتاج لـ “خمسين ألف ميسم”، وده لإن كل نبتة بتحتوي على تلات مياسم بس، وبيقول إن كل اللي محتاجينه أرض وناس عندها رغبة في شغل الفلاحة.
ووضحوا إن تاريخيًا كانوا بيقولوا إن زراعة الزعفران مش هتنجح في لبنان، بس بعد أبحاث بسيطة اكتشفوا إنهم يقدروا يزرعوه وبجودة عالية.
ازاي ممكن يساعد في تخفيف الأزمة الاقتصادية؟
المهندسين كرم وفرح شايفين إن الزراعة هي الحل الوحيد اللي ممكن يساعد في الخروج من الأزمة، خصوصًا في منطقة سهل البقاع لإنها خصبة، ده غير إنهم ماشافوش قبل كده الزراعة دي في لبنان ولا ناس بتقوم بها، فكان هدفهم إنهم يخلوا المجتمع جزء من زراعتها، ده غير إن في خبراء لبنانيين أكدوا إن زراعة الزعفران هتساهم في توظيف 5 آلاف أسرة، بعائد اقتصادي يوصل لعشرات الملايين من الدولارات سنويًا في حال توفرت الأدوات اللازمة، وإن الجودة اللي بيطلعوا بها قادرة إنها تنافس بشكل عالمي.
ومن المميزات التانية، إن العناية بها مش هتحتاج وقت وجهد دائم، ومش محتاجة لمياه وفيرة وكهربا، الحاجتين اللي بيعانوا من قلتها في لبنان، وده بجانب إن الزعفران في الأساس بيعالج أمراض كتير؛ منها الربو والسعال والأمراض المزمنة والقلب.