فوبيا الأماكن المغلقة والأماكن العالية والأسانسير والكلاب والحشرات، كلها أنواع معروفة ومشهورة جدًا وأخدت حقها في التغطية حتى من الجانب النفسي، بس الجديد بقى إن في أنواع فوبيا تانية مش مشهورة أو ماكنتش موجودة أصلًا وظهرت مؤخرًا، يمكن أشهرها فوبيا الرد على المكالمات.
تيليفوبيا (فوبيا الرد على المكالمات)
ودي ممكن تلاقيها أكثر في جيل z وأنا برجح بسبب أنهم كبروا على نمط تواصل معين وهو السوشيال ميديا، أبعت لك رسالة ترد عليها بواحدة وتبعت رسالة صوتية في أضيق الحدود علشان بتوتر لكن تكلمني على الموبايل ليه؟ البعض ممكن يربط التيلفونات بأنها شيء جد ورسمي لازم تبقى محضر لها لأن كل تواصل حولينا بقى يتم بكل الطرق إلا أنك تكلم حد في الموبايل وعلشان كده أغلب الناس تلاقيها بتعمله صامت لمدة 7 سنين مثلًا.
فوبيا الثقوب
أو بمعنى تاني بيتقال عليها “نخاريب” أو الثقوب المتكررة، زي خلايا النحل مثلًا وأي شكل مكون ثقوب أو أي حاجة منقطة، هو أنا في الحقيقة لما دورت على صورة ماقدرتش أبص عليهم ولا قدرت أختار واحدة وقفلت في ثواني وقعدت أنهج وبالتالي اكتشفت أن عندي الفوبيا دي، فدوروا عليها أنتوا لوحدكوا وخليها مفاجأة.
فوبيا التغيير المناخي
تخيل إن المشاكل البيئية اتحولت من فترة صغيرة لمرض نفسي ورعب؟ متسمى بالـ”القلق المناخي” أو الـ”القلق البيئي” وده بسبب الظواهر اللي بتحصل وحصلت مؤخرًا من حرائق الغابات وفيضانات وسيول وزلازل ويظهر لك أعراض لها، وفعلًا بدأو في محاولة إيجاد علاج والتخفيف من حدتها.
النوموفوبيا
ودي تاني فوبيا متعلقة بالتيلفونات ومش معروف ظهرت امتى بالظبط بس بالتأكيد ظهرت جديد لأنها بتوصف حالة الارتباط لينا بالتيلفونات، فوبيا وأعراض بتظهرك لو انفصلت عن موبايلك، لو نسيته في مكان مش فاكر كان فين أو كنت خارج نطاق الشبكة ومفيش مكالمات أو رسائل بتوصل لك وتبدأ دقات قلبك تزيد وإيديك تعرق وتحس أن فيه حاجة فايتاك.
فوبيا التجارب الجديدة
كتير مننا بيحسوا بالقلق من التغيير، بس ماتقلقش دي طلعت فوبيا عند ناس كتير، بيبقى عندهم خوف شديد وغير عقلاني من كل التجارب الجديدة، ولكن للأسف بيفقدوا معاها تجارب تحسين الحياة.
آخر كلمة: ماتفوتوش قراءة: تطبيق Dru: شريان حياة لمرضى السمنة والسكر