بنلاقي الشخص في أول العشرينات ولسه بيبتدي حياته.. ونسمعه بيقول “أنا خايف من الفشل”، “أنا عمري ما هعرف أحقق ذاتي”، وجمل تانية كتير بتدي نفس المعنى. وللأسف ده مش حال شخص أو اتنين، ولكن دي بقت مخاوف متعششة في عقلية جيل بحاله.. فليه ده حاصل؟ ورغم إن الموضوع يبان صغير لإنها في الآخر “مجرد أفكار”.. ولكن الحقيقة إن الموضوع أكبر من كده بكتير، لإن مجموعة الأفكار دي بتقيد الشخص وبتأثر على قدرته في الإنجاز، ده غير الأمراض النفسية الكتير زيّ الاكتئاب والمرض، اللي ممكن يصاب بيهم الإنسان لو ماعرفش يسيطر على تفكيره.. هنتكلم في مجموعة من الخطوات البسيطة اللي هتساعدك تتغلب على مخاوفك، وخلينا كمان نجبيلك أكتر المقولات التحفيزية اللي اتكلم فيها خبراء ومبدعين عرب عن الفشل، يمكن تلاقي علاجك في واحدة منهم..
الخوف من الفشل يترصد كل رغبة ليخنقها قبل أن تولد….
– مصطفي محمود
لا يوجد غير شيء واحد يمكن أن يجعل الحلم مستحيلا هو خوف الفشل
-بهاء طاهر
تصحيح مفهوم الفشل بالنسبة ليك
أولًا علشان نحل المشكلة دي من جذورها لازم نصحح مفهوم الفشل بالنسبة لينا.. هل الفشل إنك جيبت درجة مش كويسة في امتحان، إنك ما اتجوزتش؟ ولا إنك ماحررتش فلسطين وانت لسه عندك 30 سنة؟ أيًا كان إيه سبب شعورك بالفشل، فأول حاجة لازم تعيد تفكير في مفهوم الفشل، تحدد معاد “deadline” لنفسك ولو ماوصلتش للي انت عايزه بالظبط تبقى حاسس بالفشل.. لإن في الحقيقة كل شخص ماشي بسرعته اللي يقدر عليها.. وكمان خسارة حاجات زيّ وظيفة أو غيرها لا يعني إطلاقًا إنك مش موهوب وعلشان كده انت خسرت الشغلانة دي.. لإن دول ببساطة بتبقى تجارب وخبرات انت كان لازم تكتسبها، وماكنتش هتتعلمها غير بالطرق دي.
أحيانا لا يكون السقوط دليلا على الفشل فعندما سقطت تفاحة نيوتن فتحت لنا الأبواب لاكتشاف علم جديد
-ليلى المطوع
ماتقارنش نفسك بحد
لازم كمان تتجنب تمامًا مقارنة نفسك بغيرك لإن فعلًا كل واحد ليه ظروفه ووقته وطريقه في الحياة، فمقارنة نفسك بواحد أغنى منك أو أنجح منك في قسم معين، مش معناه إنه أنجح في كل حاجة.. فلما تيجي تقارن نفسك بأي حد، تأكد إن المقارنة عمرها ما هتكون عادلة أبدًا.. وفي بعض الحالات لو حسيت إن الأفكار كبيرة عليك ومش قادر تتخلص منها، ممكن تلجأ لصديق مقرب يفكرك بنجاحاتك السابقة ويقوي من روحك المعنوية أو حتى اللجوء لطبيب متخصص أو لايف كوتش يساعدك تاخد خطوات ثابتة وتبدأ تحقق حلمك.
كثير من حالات الفشل في الحياة كانت لأشخاص لم يدركوا كم كانوا قريبين من النجاح عندما أقدموا على الإستسلام .. فلا تيأس
-إبراهيم الفقي
التفريق بين الأسباب الوهمية والحقيقية
إحنا مش بننكر إن الحياة صعبة وفيها تحديات كتير، ولكن مش هنقدر ننكر برضه إن في كتير من الأوقات إحنا اللي بنحط حواجز وعوائق نفسية في مخنا، بتكون هي السبب الوحيد اللي واقف في طريق نجاحنا، زيّ مثلًا الأفكار اللي بتقولك “انت ماتقدرش” “انت مش موهوب”، “انت مش مميز”، هنا لازم “تقفش أفكارك وتكلمها بعقل.. قولها انت أفكار وهمية”!
لكي تخبز أحلامك …. عليك أن تزرع الأمل….. وتطحن الفشل….. وتعجن اليأس !
-محمد الرطبان
الإبداع هو أن يخرج الإنسان من وحل الفشل إلى إنسان يُضرب به المثل
-أحمد الشقيري
الفشل ؟ ربما يكون أحياناً صديقي وصديقك وصديق الجميع يا صديق . لكن المهم ألا يكون صديقك الوحيد
– أحمد خيري العمري
إن التميز لا يأتي من دون أن نتجرع مرارة الفشل
– عبدالله المغلوث