فاضل أيام على شهر رمضان، ومنافسات المسلسلات بتحتد والإعلانات مالية التليفزيون والشوارع، والناس بتتكلم عن المسلسلات ومتوقعين يشوفوا فيها إيه والقصة باينة ازاي من عنوانها في الإعلانات، ده غير إن في ثنائيات من النجوم شوفناهم مع بعض قبل كده في مسلسلات في رمضان، فمتوقعين الدويتو هيكون عامل ازاي، ودي عينة من التوقعات، وحتى الناس اللي ماشتغلوش مع بعض قبل كده، حبينا نجوّد ونتخيل هيكونوا عاملين ازاي.
ياسمين عبد العزيز والعوضي
دويتو مهرة والكوماندا اللي الفيسبوك مليان به دلوقتي مع توقعات للسيناريو والحوار كمان، واللي باين كده من عنوان الجواب إن مهرة بنت بلد، وهتبقى في خلافات مع الكوماندا اللي قلبه ميت، وبعدين تبتدي قصة الحب بشعلة تولع في المسلسل كله.
محمد رمضان العمدة
محمد رمضان السنة دي بمسلسل (جعفر العمدة) منتظرينه يقدم قصة مختلفة غير أهله اللي بييجوا عليه ويقتلوا عياله علشان الورث وهو ينتقم منهم في آخر كام حلقة، ومن الواضح كده إن رمضان هيعمل دور جعفر العمدة نصير الغلابة والسوبر هيرو المصري، كده كده اتعودنا على الجحدعنة والشهامة من محمد رمضان كل سنة في شهر رمضان، بس برضه مستنيين دور الجدعنة الجديد.
منى زكي محتاسة
يمكن ده أكتر مسلسل أخد أحكام مسبقة من الناس، من قبل حتى عرض البرومو بتاعه، من أول صورة انتشرت لمنى زكي من المسلسل وحصل جدال على شكلها بالحجاب، لكن احنا حابين نتكلم عن القصة اللي توقعناها من الإعلان ومن شكل شخصية منى زكي، والفنانة شكلها هتوترنا معاها 30 حلقة تانيين زي ما عملت فينا السنة اللي فاتت في مسلسل لعبة نيوتن، وخلتنا حاطين إيدنا على قلبنا وخايفين عليها وهي محتاسة على طول ومن هنا لهنا، شكلنا هنكمل معاها على نفس الخط السنة دي كمان والدنيا بتوديها وتجيبها.
بس بعيدًا عن السف، المسلسل شكله هيناقش قضية مهمة فعلًا بيعيش فيها مجتمعنا، مستنيين نشوف المسلسل.
كلاكيت تاني مرة: رمضان كريم
واحد من المسلسلات اللي الناس اتعلقت بها جدًا وبتحسسنا بأحواء رمضان الحقيقية في شوارعنا، معظم الأبطال تحس إنهم أشخاص حقيقية بتقابلهم في يومك، مشاكلهم ومواقفهم هي اللي بتحصل بيننا فعلا خصوصًا في رمضان، نفس الروتين، وحتى نفس الخناقات الرمضانية المعتادة. السنة دي اتعمل جزء تاني من المسلسل، بعد مطالبات من الجمهور، والناس مستنياه على نار.
متوقعين الحزء التاني طبعًا يكمل بنفس الأجواء، حتى مع اختلاف بعض الأبطال والممثلين، لكن الجو العام للمسلسل هيفضل بريحة رمضان ونسمة الهوا اللي بتطير الزينة في الشارع.
مصطفى شعبان بابا المجال
على غرار مسلسلات مصطفى شعبان اللي اتعودنا نشوفها من بعد ملحمة (العار)، مصطفى شعبان من وقتها تقمص شخصية البطل اللي بيتجوز ويطلق زي ما بيغير شراباته، وعنده (روقة) وعنده مشروع -غالبًا ما بيكون تاجر- وراجل ابن سوق زي ما بيقولوا، أو راجل جايبها من الصفر واشتغل في مهن بسيطة وبرضه في الشارع من صغره، ومسلسل السنة دي حتى من اسمه (بابا المجال) شكله على نفس الخط، هيطلع ابن البلد اللي مافيش منه وبيقول حكم على وزن وقافية تطلع تريند وتتكتب على ضهر التكاتك والميكروباصات، ده اللي باين من عنوان الجواب، وبنتمنى يخلف توقعاتنا ويقدم حاجة جديدة.