سواء كنت من الناس اللي بتجري كل يوم مسافات طويلة وشاقة أو كنت بتجري بس عشان تعمل فورمة الصيف الشهيرة، في الشرق الأوسط هتلاقي أماكن رائعة للجري هتخلي روتين رياضتك اليومي مش بس مفيد بل وممتع. في العالم العربي هتلاقي خليط من البقاع الحضرية والريفية الجميلة اللي تقدر فيهم تلقي العنان لخيالك ورجليك وتبدأ رحلتك اليومية بنشاط وإقبال. دي بعض القواعد اللي لازم تتبعها لما تيجي تجري في الشوارع المختلفة بالمدن العربية ومدن الشرق الأوسط علشان توفر وقت وجهد وتحافظ على سلامتك.
دوّر على شهر مناسب
بينما يعتقد البعض إن الجري في الجو الصحراوي هو مهمة مستحيلة، إلا إن الموضوع ممكن يكون في غاية السهولة لو بس عرفت امتى تتمرن. لو انت بتحب الجري داخل الصالات أو الأماكن المغلقة وعلى جهاز التريد ميل، فهيكون عندك فرص كتير للجري طول السنة، بس لو انت من هواة الجري في الشارع، فأحسن أوقات الجري بالنسبالك هتكون من شهر أكتوبر لحد شهر مارس، وأفضلهم على الإطلاق ديسمبر، ويناير، وفبراير بالذات في دول الخليج العربي. الحرارة بتكون معقولة بحوالي 21ْ أثناء النهار وبتقل كمان خلال فترة المساء.
اصحى بدري في الصيف
في مناطق زي تل أبيب أو دبي، بيكون مهم جدًا إنك تصحى بدري عشان تتفادى الرطوبة وحرارة الشمس في الصيف. في الأحوال الطبيعية، درجة الحرارة في الصيف بتكون في حدود 27ْ والرطوبة بتكون 80% ودا بيكون في الصباح الباكر من أول 6 الصبح! فمتستغربش لو صحيت الساعة 6 الصبح ونزلت الشارع تجري لقيت الشارع مليان رياضيين سواء دراجين أو عدائين بيجروا جنبك. وبينما بيكون صعب أحيانًا الاستيقاظ في معاد مبكر جدًا زي دا، بس المكافأة هتكون منظر رائع لشروق الشمس بالإضافة لحصة بدنية أكثر صحية ونشاط. المعتاد في الوطن العربي إن أغلب المشاوير والحياة الاجتماعية بتكون بعد غروب الشمس، فتقدر تجرّب بنفسك الجري بالليل، بس خلي بالك من الأطفال الصغيرين والعربيات لأن أغلب الأماكن اللي ممكن تجري فيها بتتزحم جدًا في الوقت دا من اليوم.
استعد للجري بشراء الملابس المناسبة
بسبب الحر الشديد، هتحتاج تشتري لبس يكون غالي شوية علشان تقدر تستمتع بالجري من غير مشاكل. ففي حين إنك تقدر تستمتع بالجري لمسافة طويلة في درجة حرارة 10ْ مئوية بلبس عادي بيتكون من شورت وتي شيرت وكوتشي، إلا إن مع ارتفاع درجة الحرارة بتحتاج للبس مختلف نسبيًا. غالبًا هتحتاج تجيب تي شيرت وبنطلون ممتص للرطوبة على أمل إنهم يخلّوا جسمك مستريح داخل الملابس وكمان هيخلّوك تجف بسرعة من البلل الرهيب بسبب العرق. بالنسبة لنوع الجزمة اللي محتاج تلبسها في رجلك فعندك اختيارات كتير، ولو انت مبتدئ، جمع بعض المعلومات هتلاقيها في “اللينك دا” واشتري الأنسب ليك. بس النصيحة العامة هي إنك دايمًا محتاج تجيب موديل بيوفرلك قاعدة قوية وحشو داخلي متين علشان تاخد أقصى استفادة من الجري وتضمن أكتر وضعيات مريحة لرجلك.
ماتفوّتش صالات الألعاب “الجيم” الخارجية
ممكن يكون الجري هو هوايتك أو شغفك بس لو هدفك هو إنك تفضل في فورمة مناسبة ولياقة بدنية فالأفضل هو إنك تجمع ما بين الجري وحمل الأثقال أو الحديد. لحسن الحظ، فيه “بعض الأماكن في الشرق الوسط زي دبي” بيكون فيهم كتير من صالات الألعاب الخارجية “outdoor” اللي بيوفرولك خليط مثالي من التمارين والرياضات. كتير من محبي الجري بيتجهوا للصالات دي علشان يحصلوا على أقصى استفادة، وانت تقدر تعمل زيهم.
حافظ على سلامتك
في حين يقدر الرجال في الوطن العربي يجروا في الشوارع من غير خوف، السيدات بيحتاجوا يكونوا أكثر حرصًا. فهناك بعض الأماكن في الشرق الأوسط اللي مش بيكونوا مرحبين بالرياضة للجنس الناعم. ومع إن الجري غير ممنوع قانونًا للسيدات في أي دولة، إلا إن الأمر مش معتاد وفي رأي البعض بيتعارض مع العادات والثقافة الإسلامية. الأفضل هو إنك تختبري المكان الأول، وتشوفي ايه أكتر مكان بتتجه له السيدات في المنطقة اللي انتي فيها من أجل الرياضة وهتعرفي بعدها تحددي وجهتك بسهولة.
لما تكون في مدينة من مدن الشرق الأوسط، مش هتحتاج توقف تمارين ورياضة. اتبع الخطوات اللي فاتت دي وهتلاقي نفسك بتستمتع بجري فريد من نوعه تحت شمس الصحراء العربية.