“شغل الـ8 ساعات عمره ما هيخليك غني، ليه وأنت عندك 25 سنة مابقتش مليونير وفتحت البيزنس بتاعك؟ ليه ماتعلمتش تلات لغات؟ ليه ماسافرتش 7 بلدان ده السفر فيه سبع فوائد؟ ليه مابقتيش شبه ملكة جمال العالم؟ ليه ماخدتش كورسات عن كل حاجة في الحياه علشان تتعلم”؟ “فين البراند بتاعك ياعم؟” فين فورمة الساحل؟ “ليه معملتيش فرحك باتنين مليون جنيه؟”.
سباق بنجري فيه وحاسين إننا مش لاحقين نحقق حاجة وكتير مننا بيحس بالفشل، لكن مين اللي قرر معايير النجاح دي من الأساس وليه احنا مطالبين بتحقيقها؟
هو إيه اللي فايتنا؟
دي نوعية من طاقة سلبية انفجرت في وشنا على السوشيال ميديا ولحد دلوقتي مش عارفين نطلع منها، وبيزيد أكتر مع الناس اللي بتشارك تفاصيل حياتها لينا، بنشوف اللي بينجح واللي بيتجوز واللي بيخلف واللي بيسافر واللي بيخس واللي بيتخن واللي حضر دراسات عليا واللي ساب شغله واترقى واللي طلع القمر وأنت لسه مكانك من سنين مش حاسس بحاجة ولا بتغيير، وكله كوم وفيديوهات التنمية البشرية اللي نازلة ترف علينا مع نبرة بتخضك “قوم أنت قاعد في مكانك ليه” وبعد ما بتسيب الموبايل من هنا بتحس بحالة من جلد الذات مش بيطلع منك غير بالطبل البلدي أو اتكلمت مع حد فاهم.
الفكرة إنك بتدخل بعدها في دوامة مالهاش آخر، ودوامة من الأسئلة كل واحد فيهم ممكن يوديك لمنطقة تسوحك في دماغك وكفاية بس إنك بعد ما تشوف كل ده تحس إنك “مش كفاية”، وتبدأ تتكلم مع نفسك هو إيه اللي فايتني بالظبط؟ هو احنا المفروض كلنا نبقى أصحاب شركات ويبقى عندنا البراند بتاعنا؟ هو احنا لازم نوصل نفس المكان ونحقق نفس الإنجازات؟ ليه لازم نمشي على تراك واحد ونوصل في نفس الوقت؟ لازم لما جرس إنذار الجواز يبدأ يرن حولينا نقوم ونستعد نقوم؟ طب نقوم نعمل إيه؟ أشد حيلي ازاي يا طنط يعني أعملكوا إيه؟ هو إيه اللي فايتني بالظبط وممكن يدمر لي حياتي لو مالحقتوش؟ هو أنا في خطر ولا إيه؟
بس اللي جايين نقوله لك هنا إننا مش عايزين نقلب المواجع عليك ولا نفكرك باللي بيحرق دمك، احنا عايزين نقولك احنا برضه ومعظم جيلنا عايش نفس الحالة فأنت مش لوحدك وكلنا بنلف في نفس الدايرة وواقعين في نفس الوحلة، وشايفين إننا مش مضطرين نلحق حاجة إلا لو مقتنعين بيها أو عايزنها، ولا مضطرين نجري ونمشي مشاوير مش بتاعتنا لمجرد إن بتوع التنمية البشرية قالوا أننا لازم نمشيها، ومش مضطرين نجري واحنا مش عارفين احنا بنجري لإيه من غير حتى ما ناخد نفسنا.
آخر كلمة: ماتفوتوش قراءة: دراسة: معدل سعادة الأفراد في حياتهم قد يرتبط بأسباب بيولوجية