لاعبي البلايستيشن بيستنوا من السنة للتانية الألعاب الجديدة اللي بتنزل مع كل نسخة جديدة، وبيكونوا مستنيين البلايستيشن الجديد بفارغ الصبر، ومن فترة النسخة الخامسة من البلايستيشن الجديد PS5 نزل من شركة سوني اليابانية، وكان عامل ضجة كالعادة، من تصميم شكله ومن مواصفاته، وكل الناس اللي غاوية لعب قررت إنها لازم تشتريه.
ولكن في مصر، الناس مقدرتش تشتريه، لإنه نازل في المحلات بفلوس زيادة أوي أوي، فهو سعره 500 دولار أمريكي اللي بيساوي بالمصري سبع ألاف جنيه تقريبًا، وفي معظم الدول العربية نازل بما يساوي 8000 جنيه مصري، ولكنه في مصر نزل برقم كبير جدًا، فسعره 1500 دولار أمريكي اللي بيساوي أكتر من 20 ألف جنيه مصري، وده طبعًا أكتر من ضعفه رغم إن الجمارك عليه 60% بس، واللي خلى الناس تتراجع عن إنها تشتريه.
فمعظم محبي اللعب على جهاز البلايستيشن قرروا إنهم يستنوا لغاية ما سعره ينزل، وكمان علشان يشوفوا تقييمه كمان، فممكن يكون فيه عيوب ماتستحقش كمية الفلوس دي كلها، وخصوصًا إن في كذا مشتري اشتكى من عيوب في الجهاز، وإن الجهاز مش شغال.. ولكن في كل الأحوال السعر الحالي اللي معروض من المحلات اللي في مصر مش مُبرر ولا منطقي.
آخر كلمة: ماتفوتوش قراءة: مبادرة “متغلاش عليك” لتخفيض أسعار السلع في مصر.