البرجر الصحي: مشروع تخرج في جامعة مصر الدولية يحقق حلم الوجبات السريعة الصحية

بنمر بمواقف مختلفة في اليوم، وكذلك المشاعر اللي بنحس بيها، من خمول في أول اليوم لما بنصحى الصبح لإرهاق في ساعات الشغل ومن بعدها الحماس لخروجة يوم الخميس مع الأصحاب، أو حتى تفضيل العزلة والوحدة في البيت لما يكون المزاج مش رايق. مواقف مختلفة كتير لكن بتتفق على حاجة واحدة، إن خلالهم كلهم بيجيلنا cravings إننا نمسك سماعة التليفون ونطلب أكل من برا اللي عارفينه باسم الفاست فوود أو الوجبات السريعة. مفيش سبب معين للموضوع ده، ولكن الحقيقة إن الـ Junk food أو الوجبات السريعة من الوسائل القليلة (والسريعة فعلًا) اللي بتقدر تجيب لنا السعادة أو تبسطنا شوية وتدينا إحساس بالـ Satisfaction.. لإنها ببساطة بتقدر تضيف موود من البهجة الزيادة في الأوقات السعيدة، أو بيكمل القعدة الحلوة سواء مع العيلة أو الصحاب، وبتحتوي الإنسان لما يكون في حالة إحباط، فلما ياكل الأكل ده أو الفاست فوود بيحس إن على الأقل الأكل واقف في صفه وبيطبطب عليه.. بس للأسف الحلو مابيكملش.

على قد ما وجود وجبات الـ fast food بيبقى شيء أساسي في لمة الصحاب والـ movie nights وتقريبًا أي حاجة تانية، إلا إن الأضرار الصحية اللي بتنتج عن الإفراط في تناول الوجبات دي خطيرة ولازم تتاخد على محمل الجد. ولو أنت من الناس اللي بتهتم بصحتها والـ fitness بشكل عام، فهو للأسف بتكون التضحية بالسعادة اللي بتكسبها من الـ junk food هو أول ثمن لازم يتدفع في سبيل المحافظة على اللياقة البدنية أو على الأقل المحافظة على الصحة.. ولكن دلوقتي ومع كل التطورات اللي بقينا بنشوفها في عالم التغذية وتوفير أكلات صحية، بقينا نشوف مصطلح الـ healthy junk!

مجموعة طلاب من جامعة مصر الدولية قرروا يسلطوا الضوء على مصطلح الـ healthy junk أو الوجبات السريعة الصحية كبديل عن الـ junk العادي المتعارف عليه واللي بيتسبب في أزمات صحية كتير زيّ السمنة المفرطة وارتفاع نسب الكوليسترول، بالإضافة لزيادة نسب الإصابة بالأمراض القلبية والسكر بسبب ترسب الدهون الغير مشبعة في الجسم. ده غير آلام المعدة، فالأكل الـ junk العادي اللي احنا متعودين ومتعرفين عليه سمعته وحشة بالنسبة للصحة واللياقة البدنية. ولكن مجموعة الطلاب دول قدروا يعرفونا أكتر عن الأكل الصحي السريع أو الـ healthy junk اللي تقريبًا عمر ما كان حد يتخيل إن أصلًا في حاجة اسمها كده عن طريق إطلاق حملة على السوشيال ميديا باسم Dejunked، بيناقشوا الطلاب من خلالها كل ما هو متعلق بالـjunk الصحي والنباتي.. أملًا في أجيال قادمة بأفضل صحة.

إيه هي الوجبات السريعة الصحية؟

الوجبات السريعة هي باختصار الوجبات اللي مكوناتها بتكون نباتية. ومن قبل ما نكمل، أكيد معظم الناس هتكون اتقفلت لإن مبدأ الأكل النباتي مرتبط شرطيًا في أذهان الناس إنه لازم يكون أكل طعمه أبعد ما يكون عن اللذيذ، وشبه الكرتون، أو تقريبًا بيفكروا إنه مالوش طعم خالص. وده بالظبط السبب اللي خلى طلاب جامعة مصر الدولية يعملوا مشروع تخرجهم عن تصحيح المفاهيم تجاه الأكل النباتي.

الأكل النباتي بتكون مكوناته نباتية، ولكن طريقة التحضير والإضافات الصحية بتخلي الطعم شبه متماثل تمامًا مع طعم لحم أو بروتين عادي. وكمان دلوقتي بقى في وفرة في المنتجات النباتية من برجر اللحم أو الفراخ والناجتس والهوت دوج، حتى الصوصات المختلفة. فمفيش أي نقص ممكن تحس بيه من حيث أنواع الـ Junk النباتي المُتاح.

تصحيح المعتقدات المغلوطة عن البرجر النباتي

لإن الطلبة كانوا عارفين اللي هيواجهوه من معتقدات مغلوطة في أذهان الناس واللي هتخليهم حتى مش حابين إنهم يجربوا الساندوتشات أو يهتموا بتفاصيل أكتر عن المشروع، فقرروا يبدأوا مناقشة المسألة بالطريقة العملية، وهو إجراء الـ blind fold challenge اللي من خلاله بيقوم بعض الأفراد بتذوق برجر عادي وبرجر نباتي وهما مش شايفيين، ويحاولوا يحددوا بعدها أنهي فيهم اللي كان نباتي.. والحقيقة إن كتير منهم ماقدرش يحدد الفرق!

كتير من الأخصائيين الغذائيين أظهروا دعمهم لفكرة نشر الثقافة في أهمية حماية الصحة العامة عن طريق تبديل بعض الوجبات السريعة واللجوء لبديل الـ healthy junk النباتي اللي هيديلك نفس شعور السعادة والاحتواء، بس الفرق إنك بعدها مش هتكون مضطر تتعامل مع المشاكل الصحية أو التخمة أو وجع البطن اللي بيسببهالك الـ Junk العادي! الهدف من الـ campaign مش إن الناس تغير نظامها الغذائي تمامًا للنباتية، ولكن على الأقل لما ييجي الموضوع للوجبات السريعة، يختاروا الاختيار الصحي.

آخر كلمة: جيه الوقت إننا نلجأ لبديل صحي، من غير ما نضطر نضحي بأى نوع من أنواع المتعة! وماتفوتوش قراءة: محتار تشتري أكلك النباتي منين؟ جبنالك أماكن بمختلف المنتجات وشوية وصفات..

تعليقات
Loading...