اكتشاف غريب كشفه علماء أحياء مائية، ونشرته عنهم وسائل إعلام عالمية، وهو عبارة عن بركة مميتة في قاع البحر الأحمر بتقتل كل الكائنات البحرية اللي بتقرب منها.
البركة بتوصل مساحتها ل107،00 قدم مربع أو أكتر شوية، وده تقريبًا نفس مساحة مانهاتن، بحسب الباحثين في جامعة ميامي اللي استخدموا غواصة في رحلتهم الاستكشافية اللي بدأت في 2020. البركة على عمق 1.1 ميل تحت سطح البحر/ وهو عمق مفهوش أكسجين نهائي، والبركة عبارة عن تجمع مائي شديد الملوحة عالية التركيز، وده السبب الرئيسي إنها مميتة للأحياء البحرية.
قصة البرك المميتة
الباحث سام بوركيس قال ل”لايف ساينس” إن البرك شديدة الملوحة دي من أكتر البيئات قسوة على الأرض، وأي حيوان بيقرب منها بيموت بسبب الملحوحة الشديدة بشكل فوري. بوركيس أضاف إن الأسماك المفترسة بتستنى جنب البرك القاتلة دي علشان تتغذى على المخلوقات اللي بتقرب منها، واللي وصفها بإنها كائنات غير محظوظة بتوصل هناك من غير ما تقصد.
مش أول بركة يكشتفوها
البركة الملحية المميتة اللي اكتشفها العلماء دي مش أول بركة يكتشفها علماء المحيطات، هما اكتشفوا منها العشرات في البحر الأحمر والبحر الأبيض المتوسط وخليج المكسيك طول التلاتين سنة اللي فاتوا. وعلى الرغم من كده، يُعتبر اكتشاف البحر الأحمر الأخير ده مميز بسبب عمقه الكبير، وكمان لإنه مميز لينا بسبب بعده حوالي 1.25 ميل بس من السواحل المصرية.
البحر الأحمر والبرك المالحة
بحسب الباحثين في الأحياء البحرية، البحر الأحمر فيه أكبر عدد معروف من أحواض المياه المالحة، وبيعتقد العلماء إنها أتشكلت بسبب إذابة جيوب من المعادن المترسبة من أكتر من 23 مليون سنة. وفي 2015، كان علماء الأحياء البحرية متحمسين جدًا لاكتشاف حوض ملحي على بعد أكتر من نص ميل تحت سطح خليج المكسيك سموه “آلة الماء المالح في الحوض الساخن” بسبب إنه أتكون على مدار عشرات الملايين من السنين.
دليل على الإضطرابات البيئية وشكل الحياة على الأرض
كشفت دراسة جديدة إن البرك النادرة من المياه المالحة المكتشفة في البحر الأحمر هي دليل على الإضطرابات البيئية في المنطقة، وفي نفس الوقت بتلقي الضوء على أصول الحياة على الأرض.
برك الملح في أعماق البحار هي بحيرات مالحة بشكل غير عادي أو بحيرات شديدة الملوحة بتتشكل في قاع البحر، وهي واحدة من أكتر البيئات غرابة على وش الأرض، والبرك النادرة دي بتقدم معلومات عن شكل الحياة وبدايتها على الأرض وازاي أتطورت.