بطريقة غريبة، لسه بنشوف عنصرية وتحكم خصوصًا ضد المرأة ولبسها، لكن وصلت لإنه يتم منعها من دخول المستشفى بسبب لبسها اللي مش عاجبهم!.. بنت في بيروت نشرت فيديو بتوضح فيه إنها تم منعها من دخول مستشفى جبل لبنان بسبب لبسها اللي “مش محترم” على حد قولهم! واللي قالت إنها جات بيه قبل كده ودخلت عادي، واستنكرت في الفيديو الطريقة اللي تمت معاملتها بيها، خصوصًا إنها كانت من واحدة ست زيّها، فبدل ما الستات تدعم اختيارات بعض، بنشوف البعض منهم بيساعد على ده.
هل صار بنا كوستيم زيارة للمستشفى؟ هل بتلف حالا بالبردايي لتفوت تزور اختا؟ #مستشفى_جبل_لبنان pic.twitter.com/tk4iXeDP5E
— نضال الأحمدية (@NidalAlAhmadieh) June 13, 2021
البنت كانت لابسة شورت وتيشيرت، واتقال لها إن المستشفى ممنوع تدخلها بـ “شورت” ووصفت لبسها بإنه “مش محترم”، البنت ماقدرتش تدخل تزور أختها في المستشفى في وضع صعب وتكون جنبها بسبب عنصرية وتحكم في بديهيات بننادي بالحرية في أبسط حقوق الإنسان، إنه يلبس زيّ ما يحب!
مع كل الخطوات اللي بناخدها لقدام لحرية المرأة وحرية الإنسان في العموم، ونفرح ويبقى عندنا أمل في التغيير وبنشوف ملامح لده، للأسف بتيجي مواقف تحسسنا إننا بنرجع ألف خطوة لورا، بنتمنى تغيير نظرة البعض للإنسان وعدم التدخل في حرية الناس، بأي شكل من الأشكال، ومنع الأحكام المطلقة اللي ماشيين يحدفوها على البشر.