في فيديو لايف على صفحتها على الفيسبوك، البلوجر إيفون نبيل استغاثت لإنقاذها من الانتهاكات والعنف اللي بتتعرض له من زوجها اللي حبسها في البيت وسحب منها اللابتوب والموبايل بالغصب علشان ماتقدرش تتواصل مع حد. قدرت تخبي موبايل علشان تطلع منه في فيديو تستغيث بالجمهور وتطلب النجدة والحماية وسردت تفاصيل المعاملة السيئة اللي بتتعرض لها من زوجها، واللي استمرت 8 سنين. خلال الـ 8 سنين دول كان مانعها من الشغل وبيمارس عليها أشكال كتير من التحقير والأذى النفسي، وقالت إنها كانت بتحاول دايمًا تصلح كل ده لكن في النهاية الأمور زادت عن حدها ووصلت لإنه حابسها في بيتها.
حد ينقذني حقيقي حياتي بتنهار .. انا مش عارفه اتصرف أنقذوني
ده بلاغ لمن يهمه الامرPosted by ايفون نبيل – Evon Nabil on Wednesday, September 8, 2021
ناس كتير تفاعلت مع الفيديو وتضامنوا مع إيفون وحاولوا يساعدوها واتمنوا لها السلامة. المذيعة رضوى الشربيني علقت على اللايف وطلبت منها فقط رقم تليفون تقدر تتواصل بيه معاها، ووعدتها بإنها هتحاول تتصرف. الجمهور تفاعل بشكل كبير ونشر الموضوع على نطاق واسع علشان يتم الاستجابة لاستغاثة إيفون وإنقاذها، خصوصًا إنها قالت كمان في الفيديو إن زوجها بيحاول ياخد أولادهم ويسافر.
الفيديو لمس قلوب ناس كتير وصدقوا إيفون اللي لا حول لها ولا قوة، ووصلت إنها بتصور فيديو بموبايل في البلكونة علشان حتى ماتقدرش تتكلم قدام أولادها، اللي لما حد منهم دخل عليها فجأة أثناء اللايف اضطرت توقفه وتطلب من الطفلة إنها تدخل جوا فورًا. إيفون قالت إنها تحت ضغط تهديدات قوية وإنها عمرها ما اتكلمت عن مشاكلها الشخصية لكن لما فاض بيها فكرت تستغيث بالناس، يمكن يقدروا ينقذوها.
وبالفعل، وزارة الداخلية استجابت لاستغاثتها بشكل سريع، وقالت “إنه فى استجابة سريعة للأجهزة الأمنية لما تم تداوله لمقطع فيديو على موقع التواصل الاجتماعي “فيس بوك” يتضمن استغاثة إحدى السيدات من قيام زوجها بمنعها من استخدام حساباتها على مواقع التواصل الاجتماعى وتهديدها بالإيذاء واحتجازها وأنجالها بمنزلها الكائن بـ”الزيتون – القاهرة” لوجود خلافات زوجية بينهما، وعلى الفور قامت الأجهزة الأمنية باتخاذ كافة الإجراءات القانونية”.