السينما العربية بتشهد نجاح مستمر بقالها سنين في أفلامها الروائية الطويلة، والقصيرة، والوثائقية، والسنة دي بالذات شافت ترشيحات لأفلام عربية متنوعة في مهرجانات دولية، وعملوا مُشاركات مشرفة لينا كلنا في مهرجانات عالمية زي مهرجان فينيس، ومهرجان كان اللي للأسف اتلغى السنة دي بسبب ظروف فيروس الكورونا بس أدى الحق للأفلام اللي كانت مترشحة ليه إنها تستخدم اسم المهرجان سواء في عرضها، أو في الترويج ليها.
ومن ضمن الأفلام العربية اللي حققت ظهور دولي في 2020:
هذه ليلتي
فيلم “هذه ليلتي” هو فيلم قصير من بطولة ناهد السباعي، وإخراج يوسف نعمان. قصة الفيلم بتتكلم عن واحدة فقيرة بتختبر مواقف صعبة، وغير متوقعة وهي بتفسح إبنها المصاب بمتلازمة داون في أحد الأحياء الراقية في القاهرة. الفيلم كسب الجائزة الذهبية في المسابقة الرسمية لمهرجان جنيف الدولي للأفلام الشرقية، واتعرض في مهرجان كليرمون فيران.
حنة ورد
“حنة ورد” هو فيلم قصير بيدور حوالين سيدة سودانية عايشة في مصر، وبتشتغل حنانة للعرائس قبل أفراحهم. السيدة دي بتاخد معاها بنتها اللي عندها 7 سنين الشغل، وبيناقش الفيلم مشكلة التنمر بين طبقات المجتمع المختلفة، وهو من تأليف وإخراج مراد مصطفى، وشارك في مهرجان كليرمون فيران، وكسب جائزة أحسن فيلم بمهرجان رود أيلاند بأمريكا، وهيمثل مصر في المسابقة الرسمية لمهرجان لندن السينمائي الدولي في نسخته الـ64 في شهر أكتوبر اللي جاي.
السيد بنفسجي
“السيد بنفسجي” هو فيلم رسوم متحركة مصري، بيدور حوالين حرية الاختيار، والتنوع، والاختلاف اللي بيعتبروا شئ أساسي في حياة أي شخص. الفيلم من إخراج أسامة أبو زيد، ومن إنتاج المركز القومي للسينما، ومن تأليف أحمد عبد الرحيم. والفيلم تم اختياره كممثل رسمي لمصر في مهرجان جولدن كوكر اللي بيركز على أفلام الرسوم المتحركة في بلغاريا في شهر سبتمبر.
سعاد
“سعاد” هو فيلم مصري من إخراج أيتن أمين، بيتكلم عن عالم أختين في سن المراهقة في أقاليم مصر، وهو من إنتاج مصري تونسي. وتم اختيار الفيلم للمشاركة في مهرجان كان السينمائي.
200 متر
“200 متر” فيلم روائي طويل فلسطيني، من إخراج أمين نايفة، وإنتاج مي عودة، الفيلم بيتكلم عن أسرة فلسطينية فرقها الجدار الأسرائيلي العازل، وتم اختيار الفيلم للمشاركة في مهرجان فينيسيا السينمائي.
الرجل الذي باع جلده
“الرجل الذي باع جلده” هو فيلم تونسي للمخرجة كوثر بن هنية، من بطولة يحيى مهايني، والنجمة العالمية مونيكا بيلوتشي، وديا إليان، وكوين دي بو. الفيلم بيتكلم عن رحلة شخص سوري مُهاجر للبنان، وبيقابل فنان أمريكي مُعاصر، بيتعاقد معاه، وبتغير تجربته معاه حياته. الممثل يحيى مهايني كسب جائزة أحسن ممثل عن دوره في الفيلم، والفيلم كسب جائزة أديبو كينج للإدماج في مهرجان فينيسيا السينمائي.
مفاتيح مكسورة
“مفاتيح مكسورة” هو فيلم لبناني من إخراج جيمي كيروز، ومن بطولة عادل كرم، وسارة أبي كنعان، اترشح للمشاركة في مهرجان كان السينمائي. والفيلم بيتكلم عن قصة شاب اسمه “كريم” عايش في أرض محتلة من داعش، ونفسه يهرب لأوروبا، ويكون فنان موسيقى.
شغف بسيط
“شغف بسيط” هو فيلم للمخرجة اللبنانية دانيال عربيد من إنتاج مشترك بين فرنسا، وبلجيكا، وبيتكلم عن قصة حب بين حبيبين، وبيتحدى الأحكام الاجتماعية المتشددة. وتم اختياره للمشاركة في مهرجان كان السينمائي.
عودة
“عودة” هو فيلم سعودي قصير من إخراج أنس الحميد، تم اختياره للمشركة في مهرجان كان السينمائي، وهو من إنتاج ريان باصفار، ومن كتابة عبد الرحمن القرني، وماجد الأهدل، ومن بطولة رزان طارق. الفيلم بيتكلم عن قصة شاب مسافر لوحده لجدة، وعربيته بتعطل منه في االطريق، فبيضطر يوقف عربية عشوائيًا من الطريق، وبيركب مع سيدة.
دي إن إيه
“دي ان ايه” هو فيلم من اخراج الفرنسية الجزائرية “مايوين”، وبيناقش قضية الهوية الذاتية، وبيتكلم عن قصة حياة بنت من أسرة عادية مع أهلها. وتم اختيار الفيلم للمشاركة في مهرجان كان السينمائي.