قدم لنا المخرج محمد شاكر خضير، في النص التاني من شهر رمضان، مسلسل (تحت الوصاية)، اللي بيحكي عن واحدة ست بتسرق مركب صيد كان ملك جوزها المتوفى وبتهرب لدمياط علشان تبدأ حياتها ريسة مركب بتصرف على أسرتها وبتحاول تثبت نفسها وسط شغلانة كلها رجالة.
رغم إن لسه التفاصيل ماوضحتش كفاية، ولا عرفنا إيه هي الصورة الكاملة لحياة البطلة قبل الوصول لدمياط، لكن من الواضح إن ميراث أولادها وحضانتهم كانوا تحت وصاية الجد، اللي من الواضح إنه تحت سيطرة الابن، اللي بيقوم بدوره الفنان دياب.
إيه هي الوصاية في القانون المصري؟
الوصاية معناها مسؤولية على شخص قاصر، ماكملش السن القانوني، 21 سنة، وعلى ممتلكاته، وبيكون الأب هو الوصي على أولاده، وفي حالة موت الأب، بتتنقل الوصاية دي للجد من الأب، وفي حالة وفاة الجد بتتنقل الوصاية للأم.
بتشتكي زوجات كتير من سيطرة الجد على ميراث أولادها القصر، وازاي بتتحول الوصاية أحيانًا لسلاح ضدهم وضد أولادهم، اللي بتستغله أسرة الأب أحيانًا علشان يتحكموا في الزوجة الأرملة وأولادها، وأحيانًا في الاستيلاء على ميراث الأولاد.