القرارات للسنة الجديدة كل الناس بتاخدها في لحظة حماس، ومن أول السنة هبقى شخص تاني خالص وهغير حياتي كلها للأحسن وكل الكلام الجميل ده، وطبعًا معظمه -إن ماكانش كله- بيتبخر ويروح في الهوا ونرجع زي ما كنا، لكن كمان الناس في العموم بتتفائل بإنها تاخد قرارات وتغير حياتها في بدايات، فعندك كده أول يوم في السنة في بداية الأسبوع، يعني مالكش حجة أهو لو أنت بتحب تبدأ في تنفيذ قراراتك في بدايات جديدة.
وعلشان الهزار في الموضوع ده كتر، لدرجة إننا فعلًا بنستسلم وننسى إننا أخدنا قرارات مهمة في حياتنا، عايزين نفكر نفسنا ونفكر بعض بقرارات لازم نحافظ على سعينا لتحقيقها في السنة الجديدة، لإنها هتفرق في حياتنا حتى لو بشكل بسيط، حتى لو مش بتعتبر تغيير للعالم، بس هتغير حياتنا للأحسن، وعلشان نقدر نحققها، لازم نبتدي بالحاجات الصغيرة اللي تساعدنا نبقى متفائلين، لكن هنبدأ بخطط خزعبلية؟ مش هنحقق حاجة خالص.
- نلتزم بـ healty lifestyle
طبعًا أول وأشهر القرارات بيكون الجيم والدايت، من أول السنة هروح الجيم وأبتدي دايت قاسي وأخس النص وأتمرن علشان العضلات، كل الكلام الجميل ده اللي بننساه طبعًا مع أول يوم في السنة، لكن علشان فعلًا نبتدي في تحقيق قرار تغيير شكلنا وجسمنا للأحسن علشان صحتنا، الموضوع مش هييجي باللي اتقال في أول جملة ده خالص.. لازم نبتدي بخطوة إن يكون شكل حياتنا نفسه صحي، ناكل أكل كويس وصحي ونضيف ونبطل رمرمة، ناخد بالنا من صحتنا بتمارين ورياضة (مش علشان تخلي جسمك زي بيج رامي) لكن علشان يبقى لك أسلوب حياة صحي بشكل عام.
- نتعلم مهارات جديدة
من إننا نجرب نتعلم لغة جديدة، أو نقوي ونحسن مهاراتنا في لغة ابتدينا فعلًا نتعلمها قبل كده، نتعلم حاجة جديدة في مجال شغلنا أو دراستنا، أو حتى نقرر نتعلم حاجة جديدة بعيدة خالص عن مجالنا، أي حاجة بتتعلمها هتفيدك سواء قريبة من مجالك أو لا، علشان كده لازم نسعى إننا نتعلم مهارات جديدة في السنة، علشان حرام سنة كاملة تعدي من غير ما نكون اتعلمنا ولو مهارة واحدة جديدة.
- نكون ألطف مع العالم
مع الناس اللي حوالينا، أهلنا وأصحابنا، مع الحيوانات حتى اللي بنقابلهم في الشارع، مع كوكب الأرض نفسه بكل حاجة فيه ماشيين نخربها، في السنة الجديدة لازم نحاول نكون أشخاص ألطف مع كل حاجة حوالينا، علشان الحياة لوحدها صعبة، مش مستاهلة كمان نصعبها على نفسنا وعلى غيرنا.
- البعد عن السلبية
أيًا كان شكلها في حياتك، من أحسن القرارات اللي ممكن تنفذها إنك تبعد عن الأفكار السلبية أو حتى التركيز فيها لوحدها، أكيد مش كل حاجة بمبى ولا الدنيا كلها جميلة، ويمكن يكون فعلًا المعادلة حتى مش ماشية بالمناصفة بين الإيجابية والسلبية، حتى لو السلبيات أكتر، لكن التركيز فيها لوحدها هيمنعك إنك تحقق أي حاجة، جرب تشوف أي حاجة إيجابية حواليك مهما كانت صغيرة، عوّد نفسك إن عينك تشوف الحلو كمان قبل الوحش، وإن تفكيرك نفسه يحاول يلاقي زاوية كويسة في أي حاجة قدامك.
- نجرب حاجات جديدة
غير القرارات الكبيرة زي إن هنجرب نسوق طيارة والكلام ده، أي حاجة مهما كانت صغيرة كان نفسك تجربها، حتى لو أكلة جديدة، إحساس إنك بتجرب حاجات جديدة هيخليك متحمس تحقق إنجازات كتير، ويحسسك إن السنة ماراحتش على الفاضي، جرب تسافر مكان مازورتوش قبل كده، أو جرب حتى أماكن في نفس محافظتك، أو حتى تجرب ستايل جديد في لبسك.
آخر حاجة لازم تفكر فيها، إن أيًا كان اللي حصل السنة اللي فاتت فهي عدت بحلوها ومرها، ولو كنت فاكر إنها ضاعت على الفاضي، احنا بنأكد لك إنك اتعلمت منها واستفدت خبرات كتير، فاتبسط بالسنة الجديدة وافتكر كل الحاجات الحلوة اللي حصلت السنة اللي فاتت، وتقبل أخطاءك فيها، الأخطاء دي هي اللي علمتك وخلتك الإنسان الي أنت عليه دلوقتي.
وقل لنا.. إيه القرارات اللي نفسك تنفذها في 2023؟