أهم المحطات: 6 سنين على رحيل سيدة الشاشة فاتن حمامة

يوم 17 يناير، بيوافق رحيل الفنانة الجميلة فاتن حمامة عن عالمنا.. رحيلها كان صعب على ناس كتير، ولكنها سابت للجمهور والفن ثروات من مجموعة أفلام مهمة لسه الكل بيتفرج عليها، وهتفضل الأفلام دي زيّ تراث فني هتفضل مصر تفتخر بيه.. ولإن سيدة الشاشة قدمت كتير للوسط الفني وللناس، وكانت رمز للرقة والرقي بكل ما تحمله الكلمات من معنى من حيث أدائها التمثيلي وكمان في الحياة الشخصية، قررنا نسترجع بعض من المحطات الرئيسية والمهمة في حياتها، ونشارككم بعض المعلومات اللي ممكن كتير مايكونش عارفها عن الفنانة الراحلة فاتن حمامة.

البداية كانت الفوز بمسابقة جمال للأطفال

اشتركت فاتن في مسابقة جمال للأطفال وهي عندها 6 سنين، وفعلًا فازت بلقب “أجمل طفلة في مصر”، وده اللي مهدلها طريق النجومية من سن صغير، لإن بعدها بعت والدها صور للمخرج محمد كريم، اللي كان وقتها بيدور على طفلة لدور في فيلم “يوم سعيد” مع الفنان محمد عبد الوهاب.. وبرغم من إن الدور المكتوب للطفلة كان صغير، ولكن لما شافها كاتب السيناريو عبد الوارث عسر، أُعجب بقدراتها وقرر إنه يغير في السيناريو علشان يكون لفاتن مساحة أكبر في الفيلم تقدر تظهر فيه موهبتها.. ومن بعدها ظهر اسمها في الصحف لأول مرة، وتوقعلها الكل بالمستقبل المشرق اللي كان فعلًا في انتظارها.

كانت لدغة في حرف الراء في بدايتها

كتبت فاتن في مذكراتها المنشورة، إنها كانت بتتعثر في نطق حرف الراء بشكل صحيح من صغرها، ولكنها لما التحقت بمعهد التمثيل، اكتشف الموضوع الفنان الكبير زكي طليمات اللي كان أستاذها وقتها، فبدأ يضحك معاها وكتبلها جملة مليانة بحرف الراء، وبعد شوية هزار بينهم على الموضوع، ابتدت علاقة الصداقة بينهم، وعلى آخر أول عام دراسي في المعهد، كانت قدرت تنطق حرف الراء بشكل صحيح.

دخلت فاتن عالم “هوليوود”

عن: IMDB

اشتركت فاتن في فيلم الجريمة الأمريكي “القاهرة” سنة 1963، بجانب ممثلين عالميين زيّ جورج ساندرز، وريتشارد جونسون، وإريك بولمان، وكان معاها في الفيلم كمان الفنان المصري الكبير أحمد مظهر.

كانت بتجيد اللغة الفرنسية بطلاقة

خلال لقاء تليفزيوني باللغة الفرنسية، أظهرت فاتن بلكنتها المميزة وطريقتها في الكلام رقي ورقة فعلًا مالهاش مثيل، لدرجة إن لحد دلوقتي لسه الناس بتنشر مقطع الفيديو ده على وسائل التواصل الاجتماعي، وهي مبهورة بلباقتها وإتقانها للغة بالشكل ده.

اقرا كمان: نجمات زمان ودلوقتي: إزاى اختلف مفهوم الجمال والنجومية على مر السنين؟

بداية قصة حبها مع عمر الشريف

قصة الحب الأسطورية اللي الكل بيصنف قصتهم كمثال للكابل الرومانسي اللي الكل بيحلم يعيش قصة مشابهة ليهم، بدأت من لوكيشن تصوير أول فيلم جمعهم “صراع في الوادي” واللي من المفترض إن ياخد دور البطولة شكري سرحان.. وعلى نهاية تصوير العمل، اعترفلها عمر بحبه في البلاتو، وفعلًا اتطلقت فاتن من جوزها وقتها المخرج عز الدين ذو الفقار واتجوزت عمر.. ولكن بعد زواج استمر لسنين انفصلوا عن بعض وتزوجت بعد كده من الدكتور محمد عبد الوهاب، اللي استمر زواجهم من سنة 1975 لحد ما توفت سنة 2015.

حصولها على لقب سيدة الشاشة العربية

عن: Pinterest

حصلت فاتن حمامة على لقب “سيدة الشاشة العربية” بعد أداء دور “آمال” في فيلم موعد مع الحياة سنة 1953، وكان بيشاركها بطولة الفيلم الفنانة شادية والفنان شكري سرحان.. ومش ده بس كان العمل الكبير اللي خلاها تحصل على تقدير من الجميع، فمثلًا بعد تقديمها فيلم “أريد حلًا” اللي كان بيناقش مشاكل الطلاق، أصدرت الحكومة المصرية قانون “الخلع” اللي بيحق للزوجة بيه إنها تطلق من زوجها.. وده اللي خلى كتير من الناس تقر وتعترف بدور فاتن الكبير في صياغة دور المرأة وتمكينها في المجتمع.

أهم الجوائز والتكريمات اللي حصلت عليها

قدمت فاتن أكتر من 100 فيلم ومسلسل.. وسنة 1996 كانت بتحتفل السينما المصرية بمناسبة مرور 100 عام على نشاطها، ووقتها تم اختيار فاتن كأفضل ممثلة كمان من ضمن قائمة 150 فيلم تم اختيارهم كأحسن ما أنتجته السينما المصرية، فاتن كان ليها 18 فيلم منهم، واللي بيعتبر رقم كبير جدًا، وكمان في نفس السنة كرمها الرئيس الراحل جمال عبد الناصر “ككنز وطني”، أما في سنة 2000 منحتها منظمة الكتّاب والنقاد المصريين جائزة “نجمة القرن” وحصلت على الجائزة الأولى للمرأة العربية عام 2001، ومن حيث الجوايز الدولية، فحصلت على وسام الأرز من لبنان ووسام الكفاءة الفكرية من المغرب.

آخر كلمة: رغم مرور السنين، هيفضل غياب فتاة الشاشة العربية مأثر في جمهورها من الوطن العربي كله.

تعليقات
Loading...