من بداية ظهور فيروس كورونا واجتياحه للعالم كله، وطريقة الوقاية الأهم هي ارتداء الكمامة، وقتها ظهر أنواع كتير من الكمامات، وظهر كمان الكمامات القماش القابلة للغسل واللبس كذا مرة، لكن مع مرور الوقت والدراسات اللي بتتعمل بشكل مستمر علشان نعرف أكتر عن الفيروس وازاي نحمي نفسنا من العدوى، وكمان ظهور متحورات منه، آخرهم وأشهرهم متحور أوميكرون، هل الكمامة القماش بتوفر الحماية؟ هل المفروض نلبس كمامتين مش واحدة بس؟ هل في أنواع بتوفر حماية أكبر؟
كل دي أسئلة بتدور في عقول الناس في كل مكان في العالم، علشان كده هنعرف نتائج دراسات اتعملت علشان نعرف إيه الكمامات اللي بتوفر درجة حماية أعلى من الإصاب والعدوى بمتحور أوميكرون، اللي يعتبر الأسرع انتشارًا في وقت قليل، وده اللي بيخليه بيشكل خطر أكبر.
الكمامات القماش اللي بتتكون من طبقة واحدة مش بتوفر الحماية الكافية خصوصًا من متحور أوميكرون، وده لإنها بتمنع فقط القطرات الكبيرة اللي بتحمل الفيروس، لكنها مش فعالة في منع الجزيئات الصغيرة اللي بتحمل الفيروس، والأطباء بينصحوا باستبدالها بكمامات طبية. لإن الكمامة القماش مش أكتر من زينة على الوجه زيّ ما صرحت لينا وين المحللة الطبية في CNN طبيبة طوارئ وأستاذة زائرة للسياسة والإدارة الصحية في كلية معهد “ميلكن” للصحة العامة بجامعة جورج واشنطن.
الكمامات الطبية من نوع “N95 أو KN95” بتوفر درجة حماية عالية من الإصابة بالفيروس، لإنها مجهزة بشكل صحيح لترشيح حوالي 95% من الجسيمات العالقة في الهواء والجزيئات الصغيرة، وإنها الأكثر فاعلية في تصفية القطرات والجزيئات الكبيرة والصغيرة اللي بتكون محملة بالفيروس. حسب اللي توصلت له دراسات علمية.
