لو داخل على مود اكتئاب، دي خمس أفلام ماينفعش تشوفها

كل فيلم ليه taste معين ومود قادر إنه يدخلك فيه، فيلم قادر إنه يدخلك في مود ضحك، وفيلم تحس بعد ما تشوفوه إن الحياة حلوة وتحس نفسك خفيف كده، وفيلم تاني قادر إنه يحسسك إن كل حاجة فجأة سودا قدام عينيك ومفيش أمل، ويقلب معاك بمود عياط ونكد، علشان كده جبنالك شوية أفلام سودا نكد من الدرجة الأولى، فا لو انت حاسس إنك في بوادر لمود اكتئاب حلو، ننصحك لو وقعت تحت إيدك الأفلام دي ماتجيش جنبها.

بنتين من مصر

عن: ramy

فيلم تم توظيف كل طاقة من طاقات فريق العمل علشان يطلعوا في الآخر بفيلم مأساوي من الدرجة الأولى ويجيبلك اكتئاب في ثواني، الفيلم اتكلم عن قضايا بتندرج تحت مصنف قضايا الـ Taboos قبل الثورة في الوقت ده زيّ قضايا الاحتياج الجنسي والعذرية وتأخر سن الزواج وقضايا أمن الدولة والبطالة، أشاروا في الفيلم برضه للهجرة غير الشرعية وحادثة المركب الشهيرة، في نهاية الفيلم هتحس نفسك زعلان من كل حاجة وعلى كل حاجة.

ساعة ونص

بيتكلم عن حادثة القطر بتاعت العياط الشهيرة واللي راح ضحيتها قتلى كتيرة وكانت حادثة مأساوية على المستوى الإنساني بكل المقاييس، كان أكبر تجمع للنجوم في الفيلم ده، كان من ضمنهم محمد إمام ومحمد رمضان وعمرو محمود عبد العزيز وأحمد السعدني ويسرا اللوزي وأحمد الفيشاوي وماجد الكداوني. الفيلم مش بس رصد الحادثة وازاي حصلت، كان في جانب كبير من القصص والأحلام وحكايات لركاب القطر. الفيلم كان عايز يوصل لك في مرحلة النهاية بإنك تحس إن كل قصص الأشخاص دي جزء منك أو حد من أهلك بحيث لما توصل لمشهد الموت تلاقي قلبك بيتعصر من الوجع عليهم.

انت عمري

بيتكلم عن معاناة مرضى السرطان النفسية والجسدية وازاي حياتهم بتتقلب بعد مايعرفوا الخبر. بيوصلك في الأخر فكرة سودا وهى إن مش دايمًا أحلامنا بتتحقق والحياة مش وردية طول الوقت.

دعاء الكروان

فيلم عن رواية للأديب طه حسين، بيتكلم عن فكرة الانتقام اللي هيتحول لحب بين فاتن حمامة وأحمد مظهر، هتزعل على نهاية الفيلم، وهيصعب عليك أمنة اللي هتتقتل غدر. موسيقى الفيلم قادرة إنها تدخلك في مود حزين من غير ما الممثل ينطق بكلمة.

حين ميسرة

فيلم من إخراج خالد يوسف، والمعروف عن خالد يوسف إنه دايمًا بيتكلم عن الطبقة المهمشة في مصر ومشاكلها، والإهانات اللي بيتعرضوا لها من المجتمع والأوضاع المعيشية الصعبة اللي بتجبرهم يلجأوا لحاجات منافية للأخلاق والدين.

آخر كلمة: ماتفوتوش قراءة: بعد الطاووس، مسلسلات وأفلام اتكلمت عن قضية الاغتصاب

تعليقات
Loading...