التكنولوجيا غزت حياتنا من سنين مش كتيرة، والتطورات الكتيرة اللي بنشهدها في عالم الـ gaming والتطبيقات بقيت كبيرة وسريعة وده اللي خلى معظم الأجيال متقدرش تستغنى عنها. وبالنسبة للأطفال، مش بس بيستخدموها بشكل مستمر ويومي، لكن كمان بقوا متشبعين بيها وملمين بتفاصيلها لدرجة إن في أطفال وصلوا لمراحل متطورة في عالم البرمجة! محمد السعيد هو طفل لم يتجاوز العشر سنين، مقيم في السعودية، وقرر يدخل عالم البرمجة وقدر يقطع أميال كبيرة من وهو في السن الصغير ده.
عالم البرمجة وعمليات الـ “coding” شيء برغم انتشاره وسرعة تطوره، إلا إنها عمليات صعبة ودقيقة جدًا بتتطلب دراسة و شهادات جامعية علشان تقدر تدخل المجال ده وتبدع فيه. ولكن المفاجأة إن الطفل ده تحدى كل العراقيل والمفاهيم دي، من خلال حبه وشغفه بالألعاب الإلكترونية، وده اللي خلاه يتعلم بنفسه، ويلجأ لمنصة اليوتيوب، وأسس لنفسه قناة باسم “Coding 4 kids” من سنتين علشان يعلم الأطفال لغة البرمجة، ووصلت قناته لـ21 ألف متابع. وبيعمل فيديوهات بالإنجليزي والعربي للوصول لأكبر عدد ممكن من الأطفال ويبسطلهم قواعد البرمجة.
بترجع فكرة إنشائه للقناة لما كان بيلعب محمد لعبة Roblox اللي بتتضمن عدة ألعاب ومن وقتها فكر الطفل إزاى يقدر يصمم ألعاب شبيهة. وهو مهتم بلغة البرمجة لإنها اللغة اللي بنقدر منها نخاطب الحاسوب ونقوم بمهمات معينة من خلاله. وبرغم خوف والده ووالدته عليه في البداية من التنمر وغيرها من التبعات السيئة اللي بيواجهها البعض عند استخدام السوشيال ميديا، ولكن بعد نشره لبضع فيديوهات مفيدة وناجحة على قناته، اتغير رأى عائلته تجاه الموضوع. خصوصًا إن الطفل محافظ على مستواه الدراسي وقادر يوازن بين وقته سواء في الدراسة والبرمجة وحتى لعب الرياضة زى السباحة.