عدد اللاجئين بيزيد بطريقة كبيرة ومحزنة، والعالم واقف ساكت، وهو وضع مايتوصفش بحاجة، فكلمة “محزن” أو”تعيس” أو”كئيب” قليلة عليه، إنك تحرم حد من سريره، من بيته، من شارعه، من بلده، ومن أهله كمان، حاجة مالهاش وصف، واللي بيكونوا نفسهم يساعدوا مابيقدروش يعملوا حاجة لإن الموضوع أكبر من إيدينا كمجرد مواطنين، لإننا مش بنقدر نتدخل بين سياسات، وبنقدر نساعد باللي نقدر عليه زيّ توفير أكل أو لبس أو أدوية، حاجات بسيطة جدًا ومابنحسش إننا عملنا حاجة، ولكن إيدينا بتكون مشلولة زينا زيهم، لكن في ناس بتقدر تساعد بصورة كبيرة علشان قضيتهم توصل للعالم كله، علشان الناس كلها تهتم، علشان المسئولين يساعدوا وياخدوا خطوات بجد، علشان الكل يعرف ويفهم هما بيمروا بإيه، والناس دول هما صناع الأفلام، اللي بيوثقوا حياة اللاجئين من غير أي تدخل علشان تبان زيّ ما هي علشان الكل يشوف، فتعالوا نشوف إيه الأفلام اللي عملت كده.
الذين لم يعودوا
هو فيلم وثائقي من إخراج ناثان فيشر اتعرض في سنة 2010، وبيورينا قصة خمس لاجئين عراقيين من الطبقة المتوسطة اضطروا يسيبوا وطنهم بسبب الاحتلال الأمريكي للعراق، والفيلم اتصور في سوريا والأردن.
اقرا كمان: #سكوب_أمل: حملة الطمأنينة وسيلة اللاجئين الإريتريين لمساعدة الأسر المتضررة من فيروس الكورونا.
لقد سئم الله منا
الفيلم من إنتاج أمريكي وبيتكلم عن تلات أولاد تايهين في السودان ورحلة هروبهم من وطنهم لأمريكا بسبب الحروب اللي بتدور هناك.
دارفور الآن
هو فيلم وثائقي من إخراج تيد براون بيتكلم عن الحروب في دارفور في السودان، والفيلم كان دعوة ورسالة للعالم كله علشان يقدم المساعدات.
كباتن الزعتري
هو فيلم من إنتاج مصري، ومن إخراج علي العربي، بيتكلم عن حياة لاجئين مراهقين نفسهم يلعبوا كرة، وبيحط التركيز على معاناتهم في المخيم ومحدودية أحلامهم.
اقرا كمان: فيديو: اتعرفوا على أول بنت تحصل على حزام تايكوندو أسود في مخيم الأزرق للاجئين السوريين.
مولود في سوريا
هو فيلم وثائقي بيورينا حياة اللاجئين السوريين وهما بيهربوا من حياة تعيسة لأرض غريبة عنهم.
الحياة بعد سوريا
هو فيلم وثائقي بيتكلم عن اللاجئين السوريين ومعاناتهم وإزاي المفروض البلاد تساعد في رفع العذاب عنهم.