زي ما الحظر والتباعد الاجتماعي فرقنا وزود المسافات بينا، الموضوع لعب دور كبير في ظهور أفكار وطرق مبتكرة لممارسة أنشطة حياتنا اليومية. وبما إن الفن من أكتر المجالات اللي إتأثرت بالإجراءات الاحترازية ضد فيروس الكورونا، الفنانين قدروا يتغلبوا على التحديات اللي بتواجههم بطرق مختلفة زي فيديوهات اللايف مع جمهورهم والحفلات الأونلاين اللي كان من آخرها حفلة كايروكي في الاستوديو.
وبالرغم من كل المجهودات المبذولة، تصوير الفيديوهات مع المصورين والمُعدات والفنيين يُعتبر مُخاطرة في الوقت الحالي، وكان الحل بالنسبة لبعض المشاريع الفنية التأجيل، وفي قرروا المُخاطرة والتصوير في أضيق الحدود من داخل بيوتهم.
وبالنسبة لشريف الهواري عازف الجيتار في فرقة كايروكي فهو أعلن على صفحته الرسمية على الإنستجرام إنه مسجل أغنية جديدة من فترة وعاوز يصورها، وعلشان يتجنب كل مخاطر الإصابة بالكورونا جاتله فكرة جديدة هتعتمد بشكل أساسي على جمهوره في تصويرها.
هواري قال في الفيديو اللي نشره إنه قرر إنه يستخدم في أغنيته الجديدة ماتريال من تصوير جمهوره، والشرط الوحيد للفيديوهات إنها تكون فيها عناصر من الطبيعة مع عدم وجود أي عنصر بشري، ومش مهم تاريخ التصوير أو الكواليتي. وتقدروا تبعتوا فيديوهاتكم ليه على إيميله الخاص hawarysmusic19@gmail.com.
هواري مقلش إذا كانت الأغنية دي خاصة بيه لوحده أو مع فرقة كايروكي، فبالإضافة للعب الجيتار في الفرقة، هو بيغني ويلحن ويوزع ويكتب أغاني وبيلعب على أكتر من ألة تانية زي الترومبيت. وهو برضه أول عضو من الفرقة يغني غير أمير عيد في أكتر من أغنية، ومن أشهر الأغاني اللي غناها أغنية ما عاد صغيراً من تأليف د/أحمد خالد توفيق اللي عملوها بعد وفاته في ذكراه.