اتكلم الممثل المصري أحمد زاهر عن العلاقة اللي جمعته بالممثلة المصرية غادة عبد الرازق، خلال كواليس شغلهم مع بعض في مسلسل “حكاية حياة”.
كلام زاهر جيه من خلال برنامج “المجهول” على قناة (Ibc) اللبنانية، وقال: “مافيش كيميا مع غادة عبد الرازق على المستوى الإنساني والنفسي.. لكن على المستوى الفني عملنا مشاهد جامدة مع بعض”.
وأضاف زاهر خلال حلقة البرنامج: “في عداوة بيني وبينها لكن ده من ناحيتها هي، أنا ماعملتلهاش حاجة نهائي، ممكن تكون مش بتحبني، هي حرة، مش هجبر حد إنه يحبني، براحتها، ورغم كدا هي من أقوى الممثلات في الوطن العربي وعملنا مع بعض مشاهد حلوة جدًا في مسلسل حكاية حياة”.
وحكى أحمد زاهر عن حاجات حصلت في كواليس مسلسل حكاية حياة، وقال إن الفنانة غادة عبد الرازق ماكانتش موافقة إنه يكون موجود معاها في المسلسل، وأضاف إنها رجعت في كلامها بعد كلامها مع المخرج محمد سامي والمنتجة.
قال زاهر: “أنا قعدت سنة كاملة أخس علشان دوري في مسلسل حكاية حياة، وبعدها قالولي أنت مش معانا”.
اتكلم الإنتاج مع زاهر قبل بدء التصوير، وأكد له إنه مش هيشتغل معاهم في المسلسل، وده أصابه بصدمة وخلاه انهار وحاول يواجه الصدمة دي بالصلاة والدعاء، وقال: “بعد ما اتقالي أنت مش معانا صليت ودعيت ربنا وانهرت وقتها لإنه صدمه كبيرة ليا وحتى الآن مش عارف إيه سبب كرهها ليا”.