أحلى يوم أو National Sweetest Day، هو يوم عطلة بيتم الاحتفال به في الولايات المتحدة وفلوريدا كل تالت سبت من شهر أكتوبر، للمشاركة في الأعمال أو التعبيرات الرومانسية، والأعمال الخيرية واللطف. وهو الـ sweetest لإن الناس بتقوم بالأعمال اللطيفة باستخدام الحلويات والسكريات كأحد الوسائل الأساسية للتعبير عن حب وتقدير الناس اللي حولينا.. ولإننا محتاجين أكتر نشوف لطف واهتمام الناس ببعضها، فكرنا في طرق للتعبير عنهم والاحتفال بالـ sweetest day، اللي مش لازم يقتصر الاحتفال به برا بس.. ولكن هنا كمان!
توزيع حلويات على الأيتام أو الأطفال
مفيش شعور أفضل من إنك ترسم الابتسامة في وش طفل فقير أو يتيم. ومن أكتر الحاجات اللي بتفرح الأطفال هي الحلويات.. فمن خلال زيارة قصيرة ليهم وإعطائهم بعض الحلويات، هيكون يومهم “سويت” بكل ما تحمله الكلمة من معنى!
كتابة رسائل لطيفة لزملائك في الشغل
كلنا بنحتاج نحس إننا متقدرين ومتشافين من الناس اللي حولينا. وكتير من الأحيان، مكان العمل والشغل بيكون الجو فيه روتيني وموتر بسبب ضغوطات الشغل. فلو سبت لكل زميل لك في الشغل ورقة صغيرة على مكتبه بتعبر لهم فيها عن حبك وتقديرك ليهم، وسبت جانبها شكولاتة صغيرة.. هتشوف سحر الفعل ده على رفع موود زمايلك كلهم في اليوم ده.
جلب دونتس لأصدقائك المقربين
رايح تشوف أصحابك في اليوم ده؟ ممكن تجيب معاك بوكس دونتس فيه نكهاتهم وأنواعهم المفضلة، وتدخل بيه عليهم علشان يكون re-assurance أو زيادة تأكيد على حبك ليهم، وهتكون very thoughtful إنك تجيب لكل واحد النوع اللي بيحبه مخصوص علشانه.
شارك وصفات حلوياتك المفضلة
لو أنت ليك في الطبيخ وعندك وصفات بتحبها للحلويات، ممكن تجيب قرايبك وأصحابك في اليوم ده وتقعدوا في المطبخ تتشاركوا الوصفات وتطبخوها مع بعض!
حضر الفطار لأفراد عيلتك
اصحى الصبح بدري، واعمل لأفراد عيلتك فطار حلو يكون فيه بعض الحلويات زيّ الـpancakes أو الكريب بالشكولاتة، وشوف قد إيه هيتبسطم بيه ويقدروك.