في دورته الـ88، معرض الزهور اللي بيتعمل سنويًا في حديقة الأورمان، وكل الناس بتستناه علشان تروح تستمتع بالأجواء الجميلة وسط نباتات وزهور بكل الأنواع، وفرصة كمان علشان نشتري نباتات بأسعار تبتدي من 5 أو 10 جنيه كمان، ونزين بيها البلكونة والبيت وأي مكان بنحبه، تضيفله طابع مختلف وجو من الطبيعة، المعرض السنة دي هيبتدي من يوم 1 مارس وهيستمر لمدة 45 يوم، وعلشان ماتفوتش زيارة المعرض من غير ما تجيب أحسن وأنسب نباتات ينفع تزين بيها البيت وماتكونش فيها صعوبات في اقتنائها والاعتناء بيها، تعالوا نشوف إيه أحسن نباتات ممكن نجيبها من هناك.
النعناع
من ريحته الحلوة، وسهولة العناية بيه، النعناع من أجمل النباتات اللي ينفع تجيبها تحطها في البلكونة.
الصبار
بيتميز بسهولة العناية بيه في البيت وسهولة وجوده، والصبار بيحب الشمس فلازم تحطه في البلكونة أو على الشباك، شكله جميل وكمان دلوقتي هو trendy حتى على رسومات الهدوم والإكسسوارات.
الريحان
طبعًا معروف بريحته المميزة النفاذة، لو انت بتحب النباتات اللي ريحتها فواحة ماينفعش تفوت إنك تجيب زهور الريحان من المعرض.
الياسمين
معروف بسهولة العناية بيه، مش بتحتاج غير إنك تسقيه الصبح، ونموّه سريع ومش بيتطلب منك مجهود، سهل إنك تجيبه وفي وقت قليل تلاقي ريحة المكان اللي موجود فيه كلها جميلة.
لافندر
لونه الجميل وريحته وفوايده وإنه بيساعد كمان على الاسترخاء وهدوء الأعصاب، يخلوك ماينفعش تفوت إنك تجيبه من المعرض السنة دي.
نباتات الظل
لو عايز تزين الأوضة أو أي مكان غير البلكونة أو أي مكان مفتوح للهواء والشمس، ممكن تختار نبات من نباتات الظل اللي مش بتحتاج ضوء الشمس علشان تفضل عايشة، ومنهم أنواع كتير ممكن تختار منهم اللي يعجبك.