أيام قليلة بتفصلنا عن شهر رمضان المبارك، اللي زيّ ما بنتبسط فيه بالفُرجة على المسلسلات وتقضية الوقت والفطار مع أهلنا وصحابنا، بيبقى برضه في العنصر الروحاني كده اللي بنحب نحس بيه في شهر الرحمة. واللي بيساعدنا على الوصول للإحساس ده هي البرامج الدينية، فتعالوا نشوف إيه أهم البرامج الدينية اللي هتتعرض في سباق رمضان 2021 سواء برامج جديدة اتعملت مخصوص لرمضان، أو برامج بتتعرض بقالها فترة ومكملة معانا في رمضان اللي جاي.
الثمن – مصطفى حسني
الداعية مصطفى حسني بيشارك تقريبًا كل رمضان ببرنامج بيناقش فيهم قضايا دينية واجتماعية علشان تساعد في حلول مشاكل كتير من الناس. والسنة دي هيشارك مصطفى حسني ببرنامج الثمن وهيتعرض على قناة ON E. وواضح من البرومو وكمان اسم البرنامج إنه هيتكلم عن فكرة إن أي قرار أو أفعال ليها ثمن.
لعلهم يفقهون – رمضان عبدالمعز وخالد الجندي
بدأ من خمس سنين، وبرنامج لعلهم يفقهون اللي بيقدمه الداعيين رمضان عبد المعز وخالد الجندي على قناة دي إم سي DMC هيكمل السنة دي كمان في رمضان 2021. لعلهم يفقهون برنامج ديني اجتماعي بيخاطب الناس بأسلوب عصري وبيهدف لتجديد الخطاب الديني والارتقاء بالناس.
منازل الروح – عمرو خالد
في معظم برامجه الدينية بيركز الداعية عمرو خالد على الروحانيات والارتقاء بالإيمان، والسنة دي هيقدم برنامج منازل الروح، اللي هتجمع بين مجموعة من الشباب والفتيات من دول مختلفة لمناقشة منازل الروح السبعة (منزلة التقوى – منزلة اليقين- منزلة التوكل- منزلة التسليم- منزلة الرضا- منزلة العبودية لله- منزلة محبة الله). البرنامج هيعرض الساعة 3 مساء على قناة عمرو خالد باليوتيوب والساعة 4 على حساباته بالفيسبوك وانستجرام.
قليبي قال – أحمد الطلحي
من كام ساعة، نشر أحمد الطالحي برومو برنامجه الجديد “قليبي قال” واللي بيتكلم فيه عن استفتاء القلب، وكمان نشر صورة لبرنامج تاني باسم “كأنك تعيش أبدًا” واللي كمان هيتعرض في رمضان على قناة سكاي نيوز عربية وهو برنامج ديني هيتكلم عن القضايا اللي بتشغل معظم الناس في وقتنا الحالي.
مدرسة رمضان – الشيخ عمر عبد الكافي
هيقدم الشيخ عمر عبدالكافي برنامج “مدرسة رمضان” ونشر البرومو الدعائي للبرنامج على كل صفحاته الرسمية على السوشيال ميديا.
اسأل مع دعاء – دعاء فاروق
“اسأل مع دعاء” من البرامج الدينية اللي بتتعرض بقالها كذا سنة خارج موسم رمضان وهتكمل في رمضان السنة دي مع الإعلامية دعاء فاروق اللي بيتم بثه على قناة النهار.
كن انت – سعد الدين الهلالي
من البرنامج اللي كمان هتستمر خلال موسم رمضان هو برنامج “كن انت” للشيخ سعد الدين الهلالي اللي بيناقش معاملات الإنسان الحياتية واليومية وعلاقته الاجتماعية وكيفية مواجهة المشاكل اللى ممكن يتعرض لها الإنسان من المنظور الديني.. وهيتذاع على القناة الأولى.
من القلب للقلب – إيمان رياض
برنامج من القلب للقلب للإعلامية إيمان رياض بيتعرض بقاله فترة طويلة على قناة إم بي سي مصر ومكمل معانا في رمضان 2021.
قلوب عامرة – نادية عمارة
برنامج قلوب عامرة اللي كمان بيتعرض من سنين واللي بتقدمه الدكتورة نادية عمارة هيستمر عرضه على قناة أون في موسم رمضان.