من يومين نزل فيديو وانتشر أوي على الفيسبوك لبنتين من منيا القمح، محافظة الشرقية، بيطلبوا المساعدة من الناس في الإساءات والعنف اللي بيتعرضوا له من عمهم، اللي هو جوز أمهم. وظهرت واحدة من البنات ووشها وارم، وفيه آثار ضرب عنيف جدًا، وحكت البنات إن العنف اللي اتعرضوا له ده بيحصل معاهم بشكل متكرر.
البنتين اللي في الفيديو هما فوزية وآية عطية فاروق عطية المليجي، وحكوا إن سبب الضرب هو خلاف على معاش والدهم المتوفي اللي عمهم مستولي عليه، وعلى فلوس والدهم اللي سايبها لهم في البنك، وإنهم لما بيطلبوا الفلوس دي بيضربهم وبيتهجم عليهم كل مرة. وأخر مرة، كان الضرب بسبب شغلهم في شركة اللي كان السبب في إن المعاش قل بسبب التأمينات، ولما عمهم طلب منهم يلغوا التأمينات علشان يرجع له المعاش بالكامل، رفضوا، فاتهجم عليهم وكسر الشباك وشدهم للشارع وضربهم ضرب مُبرح في نص الشارع.
كان من الواضح في الفيديو إن البنات خايفين جدًا من عمهم وأولاده وزوجته (اللي هي مامتهم)، وقالوا إنهم محتاجين مساعدة من أي حد، بسبب العنف المُتكرر اللي بيتعرضوا له من الأسرة دي.
الفيديو ده انتشر جدًا على السوشيال ميديا والفيسبوك بالذات، وبعد ساعات بس من انتشاره، كان معظم مُستخدمين السوشيال ميديا بيتكلموا عنه، والناس بتطلب من النيابة العامة إنها تتدخل علشان تحمي البنات دول من العنف اللي بيتعرضوا له.
وبعد ساعات من نشر الفيديو على السوشيال ميديا، النيابة العامة اتحركت ببلاغ مقدم من صفحة Speakup يوم الأحد 13 مارس، وتم حبس العم بتهمة التعـدي بالضـرب والحبـس والتعذيـب للبنتين للاستيلاء على المعاش، وتم حبس الأم لإن كل اللي حصل كان قدامها حسب المعلومات الأولية اللي وصلت للمباحـث، وبدأ التحقيق بالفعل.
وطلبت النيابة العامة تقرير الطب الشرعي للكشف عن إصابات البنتين وعمل التحريات اللازمة، لكن بعد ساعات بس من بداية التحقيق، انتشر خبر إن العم والأم طلعوا من النيابة بعد ما تم الصلح بينهم وبين البنات.
والنيابة قالت إنهم ماحبوش يكملوا إجراءات القضية، بالذات إن العم اللي اتعرض لهم بالضرب هو اللي رباهم من بعد وفاة والدهم واتجوز أمهم.
نتمنى إن قضية فوزية وآية تفضل محل اهتمام السوشيال ميديا، على الأقل لفترة، خصوصًا إن المُعتدين هما الوصيين عليهم، وعايشين في مجتمع ريفي، وممكن المُعتدين دول يمارسوا عليهم عنف أكبر من اللي شوفناه في الفيديو، ويمنعوهم من الوصول للسوشيال ميديا مرة تانية.
وكمان نتمنى إن المجلس القومي للمرأة يتدخل لمتابعة حالة فوزية وآية ويتأكد من إن مافيش أي عنف هيتمارس عليهم مرة تانية. وياريت ننشر أخبارهم بشكل واسع، يمكن الكلام عنهم بشكل أوسع يقدر يحقق لهم شكل من أشكال الأمان اللي مش موجود في حياتهم خالص، بالذات بعد ما القضية بقت قضية رأي عام ووصلت للنيابة.