أعلنت شركة إيني الإيطالية عن اكتشاف غاز مهم في شرق البحر المتوسط في السواحل المصرية، والاكتشاف الجديد ده أهميته الاستراتيجية كبيرة في الوقت ده لدعم التركيز على إمكانيات الدولة، وده فتح حديث عن إن الاكتشاف ده هيكون جزء من حل لأزمة الغاز اللي بيواجهها العالم بسبب الحرب الروسية الأوكرانية.
اكتشاف شركة إيني ده يعتبر الاكتشاف التاني في نفس الأسبوع لحقل غاز مصري، لإن من يومين تم الكشف عن حقل غاز جديد في منطقة دمنهور في الدلتا، والنهارده حقل غاز في شرق البحر المتوسط، وده في توقيت مهم جدًا بيعاني فيه العالم من أزمة الطاقة.
تفاصيل الاكتشاف
الشركة وضحت في بيان إن الاكتشاف الجديد بيقع في بئر الاستكشاف نرجس-1، وممكن تنميته بالاستفادة من القرب من منشآت قائمة لإيني، بئر نرجس-1 بيقع ضمن منطقة امتياز نرجس البحرية اللي بتبلغ مساحتها 1800 كيلومتر مربع في مصر وبتشغلها شركة شيفرون اللي بتمتلك حصة 45 % فيها، وبتمتلك إيني حصة 45%، أما شركة ثروة للبترول المصرية بتمتلك حصة 10%.
الحفر للاكتشاف حصل على عمق 1014 قدم (309 أمتار) من المياه بواسطة سفينة الحفر ستينا فورث، وحسب اللي رصدته منصة الطاقة المتخصصة؛ فإن حجم الاحتياطيات القابلة للاستخراج من بئر النرجس تُقدر بـ 3.5 تريليون قدم مكعبة.
الاكتشاف التاني في نفس الأسبوع
زي ما ذكرنا في البداية، اكتشاف حقل الغاز بواسطة شركة إيني الإيطالية يعتبر الاكتشاف التاني في نفس الأسبوع، بعد ما أعلنت شركة (فينترسال ديا) الألمانية يوم 12 يناير عن أحدث اكتشافات الغاز في مصر، في إحدى مناطق الامتيازات الخاصة بها في دلتا النيل؛ وتم العثور على الغاز من قِبل فينترسال ديا في منطقة التنقيب في شرق دمنهور في منطقة دلتا النيل الساحلية، زي ما جيه في بيان أصدرته الشركة.
وعن اكتشافات الغاز في الدلتا، المهندس مدحت يوسف، نائب رئيس الهيئة العامة للبترول السابق، صرح إن منطقة الدلتا غنية جدًا بالغاز الطبيعي، وقال: “الاكتشافات في المياه العميقة تمثل الاكتشافات الكبيرة التي تمدنا بكميات ضخمة من الغاز الطبيعي، ومنطقة الدلتا تعوم على غاز”.
شركة إيني اللي بتمتلك الحكومة الإيطالية حصة مسيطرة فيها، بتسعى لاكتشاف مصادر غاز جديدة ضمن جهودها لتوفير بدائل تغطي كامل واردات الغاز الروسي بحلول سنة 2025، وده في أعقاب الأزمة الروسية الأوكرانية.