الفترة الأخيرة شهدت أكتر من خبر عن عمليات اختطاف للأطفال بغرض السرقة والابتزاز. وعلى الرغم من نجاة أحد الأطفال مؤخرًا من عملية اختطاف، بعد ما تتبع أفراد الأمن الخاطفين وتم القبض عليهم ورجع الطفل لحضن أبويه ولحياته الطبيعية، إلا إن في طفل تاني ماكانش عنده نفس الحظ. في شهر يونيو اتعرض الطفل إسماعيل السيد للخطف من قبل مسجل خطر في محافظة الغربية بهدف سرقة التوك توك اللي الطفل كان بيشتغل عليه، بس الموضوع ماوقفش لحد هنا.
مش بس اكتفى السارق إنه ياخد التوك توك من طفل عمره 11 سنة، عن طريق استدراجه وتخديره، لكن وصل بيه الوحشية إنه كمان يربطه بالحبال من إيده ورجله وكمان ربط رأسه بقدمه.. واستمر الطفل المسكين على الحال ده لمدة 18 ساعة لحد ما عثر عليه أهله وهو في حالة خطيرة، مقيد في منطقة مقطوعة. تم نقله للمستشفى وتم إجراء عمليات جراحية، تم خلالها بتر كف اليدين وبتر قدمه اليمنى. وبعد صراع طويل مع المرض، توفى من كم ساعة بسبب إصابته بتسمم في الدم.
فعلًا الجرائم من النوع ده بتخلينا نتوقف في ذهول قدام المجرمين اللي بيتجردوا من أي مشاعر إنسانية أو أي رحمة، بتبرر لهم تعذيب وقتل أي إنسان لمجرد التحصل على بعض الفلوس.. تعازينا لعائلة الطفل إسماعيل السيد وبنتمنى سرعة القبض على المجرم اللي أنهى حياة طفل لسه ماكانش بدأ حياته ودمر عائلته.